ပေကျင်း၊ မေ ၁၉ ။                ။ တရုတ်နိုင်ငံတွင် ဆန့်ကျင်သူများ၏ နှစ်အတန်ကြာ ကန့်ကွက်ဆန္ဒပြမှုများကြောင့် နှစ်စဉ် ဇွန် ၂၁ ရက်၌ ကျင်းပမြဲဖြစ်သည့် ကျန်ဇီပြည်နယ် ယုလင်းမြို့က လိုင်ချီးနှင့် ခွေးသားစားပွဲတော်တွင် ခွေးသားရောင်းချခြင်းကို အာဏာပိုင်များက ပိတ်ပင်လိုက်ပြီဖြစ်ကြောင်း တက်ကြွလှုပ်ရှားသူများ၏ မေ ၁၉ ရက် ထုတ်ပြန်ချက်တစ်ရပ်အရ သိရသည်။

ဆန္ဒပြမှုများတွင် ပါဝင်သော တရုတ်က Duo Duo Project နှင့် ဗြိတိန်က Humane Society International H.S.I တို့၏ ထုတ်ပြန်ချက်တွင် ယုလင်းအစိုးရက ဇွန် ၁၅ ရက်က စကာ စားသောက်ဆိုင်များ၊   ဈေးများနှင့် အခြားစီးပွားရေးနေရာများတွင် ခွေးသားရောင်းချခြင်းများကို တားမြစ်သွားတော့မည်ဖြစ်ကြောင်း သိရသည်။

“ယုလင်းခွေးသားစားပွဲတော်ဟာ နိဂုံးချုပ်မှာတော့ မဟုတ်ပါဘူး။ ဒါပေမယ့် တားမြစ်တယ်ဆိုတဲ့ သတင်းမှန်ပါစေလို့ ကျွန်တော်တို့ မျှော်လင့်ပါတယ်။ တရုတ်နိုင်ငံက ရာဇဝတ်မှု ပြည့်နှံနေတဲ့   ခွေးသားကုန်သွယ်အရောင်းအဝယ် ပပျောက်ရေးအတွက် တအားတက်စရာပါပဲ။”ဟု H.S.I မှ ပညာရှင် ပီတာလီက ဆိုသည်။ အဆိုပါ ပွဲတော်အတွက် ခွေးများ ခိုးယူခြင်း၊ အပျောက်ရှင်းခြင်းများ ကိုလည်း စောင့်ကြည့်လျက်ရှိကြောင်း ပြောသည်။

ယုလင်းကွန်မြူနစ်ပါတီအတွင်းရေးမှူးသစ် မိုဂေါင်မင်း ထုတ်ပြန်သည့် ယခုတားမြစ်မိန့်သည် တက်ကြွလှုပပ်ရှားသူများက အောင်ပွဲတစ်ရပ်အဖြစ် ကြိုဆိုကောင်းချီးပေးသော်လည်း တားမြစ်မိန့်က ယာယီသာဖြစ်မည်ကို စိုးရိမ်လျက်လည်း ရှိနေသည်။

“တားမြစ်မိန့်က ယာယီဖြစ်တယ်ဆိုရင်တောင် ခွေးသားအရောင်းအဝယ်ဈေးကွက် ပြိုလဲရေးအတွက် အစပျိုးလိုက်ခြင်းအဖြစ် ကျွန်တော်တို့ မျှော်လင့်ပါတယ်။”ဟု Duo Duo Project မှ ဒါရိုက်တာဖြစ်သူ အန်ဒရီယာကျန်းက ပြောခဲ့သည်။