ဆီးရီးယားတွင် အိုင်အက်စ်တို့၏ တိုက်ခိုက်မှုကြောင့် လူပေါင်း ၅၀ ကျော်သေဆုံး

ဆီးရီးယားတွင် အိုင်အက်စ်တို့၏ တိုက်ခိုက်မှုကြောင့် လူပေါင်း ၅၀ ကျော်သေဆုံး

 မေ ၁၉ ။                    ။ အစ္စလာမ်မစ်နိုင်ငံတော်အဖွဲ့ အိုင်အက်စ် တို့သည် ဆီးရီးယားအလယ်ပိုင်းမှ ဟာမားခရိုင်အတွင်းရှိ အစိုးရ ထိန်းချုပ်ရာ ရွာ ၂ရွာသို့ ကြာသာပတေးနေ့က တိုက်ခိုက်ခဲ့ပြီး လူပေါင်း ၅၀ ကျော်ကို သတ်ဖြတ်ခဲ့ကြောင်း စောင့်ကြည့်လေ့လာသူများက ပြောခဲ့သည်။

ဆီးရီးယားနိုင်ငံနှင့် အီရတ်နိုင်ငံအတွင်းရှိ ၎င်းတို့၏ ပိုင်နက်နယ်မြေများကို လက်လွှတ်ဆုံးရှုံးနေရသော အဆိုပါ ဂျီဟတ်ဝါဒီများသည် အစိုးရထိန်းချုပ်ရာ ရွာ ၂ ရွာရှိ လူများကို ကွပ်မျက်ခဲ့ကြောင်းလည်း သိရသည်။

ဗြိတိန်အခြေစိုက် ဆီးရီးယား လူ့အခွင့်အရေး စောင့်ကြည့်လေ့လာရေးအဖွဲ့က အိုင်အကစ် တို့သည် အယ်ကာရက်ဘ်နှင့် အယ်လ်မာဘူဂျာ အမည်ရှိ ရွာ ၂ရွာကို တိုက်ခိုက်ခဲ့ပြီး အရပ်သား ၁၅ ဦးနှင့် အစိုးရဘက်မှ တိုက်ခိုက်ရေးသမား ၂၇ ဦးကို သတ်ဖြတ်ခဲ့ကြောင်း ပြောခဲ့သည်။

ခရိုင်အရှေ့ပိုင်းရှိ ရွာ ၂ရွာ သို့ တိုက်ခိုက်မှုအတွင်း အိုင်အကစ်တို့ဘက်မှလည်း တပ်သား ၁၅ဦး ဆုံးရှုံးခဲ့ရ ကြောင်း စောင့်ကြည့်လေ့လာသူများက ပြောခဲ့သည်။

စောင့်ကြည့်လေ့လာရေးအဖွဲ့မှ ဒါရိုက်တာ ရာမီအက်ဘ်ဒယ်ရာမန်က အရပ်သား ၃ဦးကို အိုင်အက်စ် တို့က ကွပ်မျက်ခဲ့ပြီး ထို ၃ဦးမှာ အမျိုးသားတစ်ယောက်နှင့် သူ၏ ကလေး ၂ ယောက် ဖြစ်ကြောင်း ပြောခဲ့သည်။

အခြားသူများမှာ တိုက်ခိုက်မှုအတွင်း သေဆုံးခဲ့သလား ကွပ်မျက်ခံခဲ့ရသလားဆိုတာကို ရှင်းရှင်းလင်းလင်း မဖြစ်သေးကြောင်း သိရသည်။

ဆီးရီးယားနိုင်ငံပိုင် သတင်းဌာနမှလည်း အိုင်အကစ် တို့၏ သဲကြီးမဲကြီး တိုက်ခိုက်မှုကြောင့် လူပေါင်း ၅၂ ဦး သေဆုံးခဲ့ကြောင်း သတင်းတင်ပြခဲ့သည်။ အိုင်အက်စ်တို့သည် ရွာသားများ၏ အလောင်းများကို ခုတ်ထစ်ဖြတ် တောက်ခဲ့ပြီး သူတို့၏ နေအိမ်များကို ဖောက်ထွင်းကာ ပစ္စည်းများခိုးယူသွားခဲ့ကြောင်းနှင့် သေဆုံးသူများထဲမှ ၁၅ဦးမှာ ကလေးများဖြစ်ကြောင်း အဆိုပါသတင်းဌာနက ဖော်ပြခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly

Tags