ဆော်ပေါလို၊ မေ ၁၈ ။            ။ ဘရာဇီးနိုင်ငံတွင် သမ္မတ မိုက်ကယ်တီးမား၏ ငွေကြေးအရှုပ်တော်ပုံ ထွက်ပေါ်လာပြီးနောက် ၎င်းအား စွပ်စွဲပြစ်တင်ရန် တောင်းဆိုသည့် ရာပေါင်းများစွာသော ဆန္ဒပြသူများက ဆော်ပေါလိုမြို့ရှိ အထင်ကရ ပေါလီစတာရိပ်သာလမ်းအား ပိတ်ဆို့ထားကာ ဆန္ဒပြကြသည်။

အကျင့်ပျက်ခြစားမှုဖြင့် လက်ရှိတွင် ထောင်ကျနေသော လွှတ်တော်ဥက္ကဌဟောင်းဖြစ်သူထံ ငွေအမြောက်အမြားပေးအပ်ခဲ့ရကြောင်း သမ္မတ တီးမားနှင့် လုပ်ငန်းရှင်တစ်ဦးတို့ ဆွေးနွေးပြောဆိုနေသည်ကို လျှို့ဝှက်အသံဖမ်းထားခံရကြောင်း O Globo သတင်းစာက မေ ၁၇ ရက်တွင် ဖော်ပြခဲ့သည်။

အဆိုပါသတင်းကို တီးမားက ချက်ချင်း ငြင်းဆန်သည်။

လတ်တလော အတည်မပြုနိုင်သေးသည့် အဆိုပါသတင်းစာပါ သတင်းအရ အသားထုတ်ပိုးကုမ္ပဏီကြီးဖြစ်သည့် JBS မှ အမှုဆောင်တစ်ဦးဖြစ်သူ ဂျိုးစလေးဘာတီစတာနှင့် တီးမားက မတ် ၇ ရက်က တွေ့ဆုံကာ လွှတ်တော်ဥက္ကဌဟောင်းအား ငွေပေးနေရသည့်အကြောင်း ပြောဆိုခဲ့ခြင်းဖြစ်ကြောင်း သိရသည်။

ဖော်ပြပါသတင်းအရ ဘာတီစတာသည် တီးမားနှင့် စကားပြောဆိုမှုကို အသံဖမ်းထားခဲ့ကြောင်း၊ အောက်လွှတ်တော်ဥက္ကဌဟောင်း ကန်ဟာအား လာဘ်ထိုးနေရသည့် သဘောဖြင့် ငွေအမြောက်အမြားပေးနေရကြောင်း ဘာတီစတာက ပြောဆိုခဲ့ခြင်းဖြစ်သည်။

လွှတ်တော်ဥက္ကဌဟောင်း ကန်ဟာသည် ဘရာဇီးနိုင်ငံက အကြီးဆုံး ရေနံကုမ္ပဏီကြီး Petrobras ၏ အလွဲသုံးစားအရှုပ်တော်ပုံတွင် ဒေါ်လာသန်းပေါင်းများစွာ လာဘ်ယူခဲ့မှုဖြင့် ထောင်ချခံထားရခြင်းဖြစ်သည်။

ဘာတီစတာ၏ ပြောဆိုမှုကို သမ္မတ တီးမားက ပြန်လည်ပြောဆိုရာတွင် “ခင်ဗျားအနေနဲ့ ဒီလိုပဲ ဆက်လုပ်သွားဖို့ လိုတယ်။”ဟု လာဘ်ပေးလာဘ်ယူကိစ္စကို   ထောက်ခံသည့်သဘော ပြောဆိုခဲ့ခြင်းဖြစ်သည်။

ထိုစကားပြောဆိုမှုကို သတင်းစာက မည်သို့ ရရှိခဲ့သည်ကိုတော့ ဖော်ပြခြင်းမရှိပေ။

ယင်းသတင်းမှာ ချက်ချင်းပျံ့နှံ့သွားပြီး တီးမားအား ဆန့်ကျင်သည့် လက်ယာစွန်းသမားများက သမ္မတတီးမားကို စွပ်စွဲပြစ်တင်ရန် တောင်းဆိုလာကြခြင်းဖြစ်သည်။