ကာတာနိုင်ငံမှာ ကျင်းပတဲ့ ဒိုဟာဖိုရမ်ကို သူရဦးရွှေမန်းဦးဆောင်တဲ့ မြန်မာကိုယ်စားလှယ်အဖွဲ့ တက်ရောက်

ကာတာနိုင်ငံမှာ ကျင်းပတဲ့ ဒိုဟာဖိုရမ်ကို သူရဦးရွှေမန်းဦးဆောင်တဲ့ မြန်မာကိုယ်စားလှယ်အဖွဲ့ တက်ရောက်

မေလ ၁၄-၁၅ ရက်တွေမှာ ကာတာနိုင်ငံမှာ ကျင်းပပြုလုပ်တဲ့ ၁၇ ကြိမ်မြောက် ဒိုဟာဖိုရမ်ကို ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင် ဥက္ကဌ သူရဦးရွှေမန်း အပါအဝင် မြန်မာကိုယ်စားလှယ်အဖွဲ့ တက်ရောက်ခဲ့ပါတယ်။

အဆိုပါ ဖိုရမ်မှာတော့ နိုင်ငံတကာနဲ့ ဒေသတွင်း ဖွံ့ဖြိုးရေး၊ တည်ငြိမ်အေးချမ်းရေးနဲ့ ဒုက္ခသည် အရေး စတဲ့ ကိစ္စရပ်တွေနဲ့ပတ်သက်လို့ ဆွေးနွေးကြတာဖြစ်ပါတယ်။

မြန်မာနိုင်ငံက ကိုယ်စားလှယ်များအဖြစ် ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင် ဥက္ကဌ သူရဦးရွှေမန်း၊ ငြိမ်းချမ်းရေးနှင့် လုံခြုံရေးဆိုင်ရာ လေ့လာမှုအဖွဲ့အစည်း MIPSS တည်ထောင်သူနှင့် အမှုဆောင်ဒါရိုက်တာ ဒေါ်ခင်မမမျိုး နဲ့ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်း UMFCCI ဥက္ကဌ ဦးဇော်မင်းဝင်းတို့တက်ရောက်ခဲ့ပါတယ်။

"နိုင်ငံတကာ ပူးပေါင်းဆောင်ရွက်မှုနှင့် နိုင်ငံရေး၊စီးပွားရေး တည်ငြိမ်မှု၏ အရေးပါမှု" ဆိုတဲ့ ခေါင်းစဉ်နဲ့ ပြုလုပ်တဲ့ ယင်းဖိုရမ် ဖွင့်ပွဲမှာတော့ အကြောင်းအရာလေးခုကို ဆွေးနွေးသွားမှာ ဖြစ်ပြီး ကမ္ဘာ့နိုင်ငံရေး မြင်ကွင်းအတွင်း အသွင်ကူးပြောင်းရေး၊ ကမ္ဘာလုံးဆိုင်ရာ အပြောင်းအလဲများ (ရေနံနှင့်စွမ်းအင်ကိစ္စရပ်များ) အဆင့်မှာ စီးပွားရေးဖွံ့ဖြိုးမှုနှင့် ရင်းနှီးမြုှပ်နှံမှုဆိုင်ရာ စိန်ခေါ်မှုများ၊ ဒုက္ခသည် ကိစ္စရပ်များတွင် နိုင်ငံရေးနှင့် စီးပွားရေးရာ ကဏ္ဍများနှင့် ဒုက္ခသည်အရေး ကိုင်တွယ်မှုပိုင်းမှာ ဥပဒေရေးရာနှင့် လူသားတို့ရဲ့ အရေးပါအရာရောက်ခြင်း တို့ ဖြစ်ပါတယ်။

ဒိုဟာဖိုရမ်သို့ မြန်မာကိုယ်စားလှယ်အဖွဲ့ ပါဝင်တက်ရောက်မှုအပေါ် မြန်မာနိုင်ငံဆိုင်ရာ ကာတာသံအမတ်ကြီး HE Mr. Hassan Bin Mohamed Rafei Al-Emadi က ချီးကျူးစကား ဆိုသွားခဲ့ပါတယ်။

ဒိုဟာဖိုရမ်မှာ မြန်မာကိုယ်စားလှယ်အဖွဲ့ ပါဝင်တက်ရောက်ခြင်းကလည်း မြန်မာနဲ့ ကာတာ နှစ်နိုင်ငံအကြားရင်းနှီးချစ်ကြည်တဲ့ ဆက်ဆံရေးကို ထင်ဟပ်စေပြီး ယင်းဆက်ဆံရေးကို ပိုမိုခိုင်မာစေမယ့် အပြန်အလှန်အကျိုးဖြစ်ထွန်းမှုတွေ ရှိနိုင်မည်ဖြစ်ပါကြောင်းနှင့် ယခုလို မြန်မာကိုယ်စားလှယ်အဖွဲ့ တက်ရောက်ခြင်းက အနာဂတ်ကာလ ကဏ္ဍအားလုံးမှာ ပူးပေါင်းဆောင်ရွက်နိုင်မယ့် နယ်ပယ်ကဏ္ဍသစ် တွေကိုလည်း ဖွင့်လှစ်ပေးရာရောက်ကြောင်း သံအမတ်ကြီး Al-Emadi က ပြောပါတယ်။

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly