ရန်ကုန် ၊ မေ ၁၂။ ။ ဇွန်လတွင် ကျင်းပပြုလုပ်မည့် Under Dawg Festival တွင် ပါဝင် ဖျော်ဖြေမည့် အမေရိကန်ရက်ပ်ပါ အဆိုတော်တစ်ဦးဖြစ်သည့် Soulja Boy သည် မေလ ၁၃ ရက်တွင် The Vibe Club ၌ ပြုလုပ်မည့် Road To UnDerDawg အတွက် မြန်မာနိုင်ငံသို့ ရောက်ရှိလာပြီး ပရိသတ်များနှင့်လည်း တွေ့ဆုံခဲ့သည်။
Road To UnDerDawg @ The Vibe အတွက် ပါဝင်ဖျော်ဖြေမည့် Soulja Boy နှင့် စာနယ်ဇင်း မိတ်ဆက်ပွဲကို မေလ ၁၂ ရက် နေ့လည် ၁ နာရီ တွင် Junction City Promotion Area ၌ ကျင်းပ ပြုလုပ်ခဲ့သည်။
စာနယ်ဇင်း မိတ်ဆက်ပွဲနှင့်အတူ Soulja Boy ပရိသတ်များ အတွက် Artist Meet & Greet အစီအစဉ်များ ၊ Under Dawg Festival ပွဲ လက်မှတ် များ ကိုလည်း ကံစမ်း မဲဖောက်ပေးခြင်းတို့ ပြုလုပ်ခဲ့သလို Soulja Boy မှ ပရိသတ်များကို တေးသီချင်းများဖြင့် ဖျော်ဖြေခဲ့သည်။
Soulja Boy မှ " မြန်မာပြည် လာရတဲ့ အတွက် အရမ်းဝမ်း သာပါတယ်။လေယာဉ်အချိန်အကြာကြီး စီးလာရပေမယ့် ဒီရောက်တဲ့ အခါ ပရိသတ်တွေ အများကြီးနဲ့ တွေ့ဆုံရတဲ့ အတွက် ဝမ်းသာပါတယ်" ဟု ပြောခဲ့သည်။
Under Dawg Festival တွင် နာမည်ကြီး အဆိုတော်များ ဖြစ်ကြသည့် ဂရမ်မီ ၃ ဆုရှင် အမေရိကန်ရက်ပ်ပါ Nelly ၊ တောင်ကိုရီးယား 2NE1 အဖွဲ့၏ ခေါင်းဆောင်ဟောင်း CL နှင့် ဂရမ်မီဆုစာရင်းဝင် ရက်ပ်ပါ Soulja Boy တို့က ဖျော်ဖြေတင်ဆက်ကြမည် ဖြစ်သည်။
ထိုဖျော်ဖြေပွဲကို ယခင်က မေလ ၁၃ ရက်တွင် သုဝဏ္ဏဘူမိကွင်း၌ ကျင်းပပြုလုပ်ရန် စီစဉ်ထားသော်လည်း ပါဝင်ဖျော်ဖြေမည့် အနုပညာရှင်ထဲမှ NELLY ၏ မိသားစုအရေးပေါ် ကိစ္စများ နှင့် အတူ ပွဲကျင်းပ ပြုလုပ်ခွင့်အမိန့် ရရှိမှု နှောင့်နှေးမှုများကြောင့် ဇွန်လသို့ ပြောင်းရွှေ့ ကျင်းပခြင်း ဖြစ်သည်။
ဖျော်ဖြေပွဲ လက်မှတ်များကို CUBE B [ Standing ] အတွက် တစ်စောင်လျှင် ၃ဝဝဝဝကျပ် ၊CUBE A [ Standing] အတွက်ကို တစ်စောင်လျှင် ၆၅ဝဝဝကျပ် ၊ VIP [STANDING] တစ်စောင်လျှင် ၂ဝဝဝဝဝကျပ် ၊ VIP [SITTING] အတွက်ကို တစ်စောင်လျှင် ၃ဝဝဝဝဝကျပ်ဖြင့် သတ်မှတ်ထားသည်။