ခေတ်မီမွေးမြူရေးဇုန်များ တည်ဆောက်ရေး မွေးမြူရေးအဖွဲ့ချုပ်အဆိုပြု

ခေတ်မီမွေးမြူရေးဇုန်များ တည်ဆောက်ရေး မွေးမြူရေးအဖွဲ့ချုပ်အဆိုပြု
ဓာတ်ပုံ-UMFCCI

မေလ ၃ ။           ။ မွေးမြူရေးကဏ္ဍနှင့် ပတ်သက်ပြီး မျိုးစပ်နွားများမွေးမြူရေးအပါအဝင် ခေတ်မီမွေးမြူရေးဇုန်များ တည်ဆောက်ရေးအတွက် မွေးမြူရေးအဖွဲ့ချုပ် ဥက္ကဋ္ဌ ဦးဝင်းစိန်ဦးဝင်းစိန်က မေလ ၂ ရက်တွင် အဆိုပြုသည်။

ယနေ့ မေလ ၂ ရက်၊ နေ့လည်ပိုင်းတွင် UMFCCI ၌ စီမံကိန်းနှင့် ဘဏ္ဍာရေးပြည်ထောင်စုဝန်ကြီး ဦးကျော်ဝင်းနှင့် စီးပွားရေးလုပ်ငန်းအသင်းအဖွဲ့များ တွေ့ဆုံဆွေးနွေးပွဲတွင် ပြောခဲ့ခြင်း ဖြစ်သည်။

နို့စားနွားများမွေးမြူရေး၊နို့နှင့်နို့ထွက်ပစ္စည်းများ တင်ပို့ရေး၊ ခေတ်မီမွေးမြူရေးဇုန်များ တည်ဆောက်ရေး၊ တောင်သူများအား နည်းပညာပံ့ပိုးပေးရေး၊ မျိုးစပ်နွားမွေးမြူရေးအတွက် တောင်သူများအား   ငွေထုတ်ချေးပေးသင့်ကြောင်း အဆိုပြုခဲ့ခြင်း ဖြစ်သည်။

ခွာနာလျှာနာကဲ့သို့သော ရောဂါအနာကုသနိုင်မည့် ခေတ်မီမွေးမြူရေးဇုန်များတည်ထောင်ရန်၊ တောင်သူများအား အသေးစားမွေးမြူရေးဇုန်များတည်ထောင်နိုင်ရန် နည်းပညာပံံ့ပိုးပေးခြင်း၊   တောင်သူများအား မျိုးစပ်နွားများ မွေးစေပြီး အကောင်ရေအလိုက် ချေးငွေထုတ်ပေးသင့်ကြောင်း ၀န်ကြီးသို့ အဆိုပြုခဲ့သည်။

စီမံကိန်းနှင့် ဘဏ္ဍာရေးပြည်ထောင်စုဝန်ကြီး ဦးကျော်ဝင်းက  မွေးမြူရေးလုပ်ငန်းရှင်များအား “ မွေးမြူရေးဇုန်များ၊ အအေးပေးရုံနယ်စပ်ဒေသများနှင့်ပြည်နယ်တိုင်းများတွင် တည်ဆောက်ခွင့်အား ရင်းနှီးမြှုပ်နှံမှုကော်မရှင်ထံသို့ အမြန်ဆုံးတင်ကြပါ” ဟု ပြောသည်။

မွေးမြူရေးကဏ္ဍတွင် အေးခဲအမဲသားနှင့်ဆိတ်သားများအား ဓာတုပစ္စည်းတွေ့ရှိသည်ဟုဆိုကာ တရုတ်နိုင်ငံမှ ပိတ်ပင်လိုက်ခြင်းကြောင့် ကန်ဒေါ်လာ သန်း ၈၀ တန်ဖိုးရှိ အသားပို့ကုန်စျေးကွက် ရပ်တန့်သွားသည်ဟု မွေးမြူရေးအဖွဲ့ချုပ် ဥက္ကဋ္ဌ ဦးဝင်းစိန်က ပြောသည်။

ထို့ကြောင့် မြန်မာ့မျိုးရင်း အသားစားနွားများအား ဘရာမင်နွားမျိုးဖြင့် မျိုးစပ်လျှင် ၃ နှစ်အတွင်း ကီလို ၅၀၀ အထိ ရရှိကြောင်း ၊ အသင်းမှ စမ်းသပ်မွေးမြူရာတွင်   အောင်မြင်သဖြင့် ရေရှည်တွင်    နိုင်ငံခြားဝင်ငွေရရှိနိုင်ကြောင်း မွေးမြူရေးအဖွဲ့ချုပ်မှ အဆိုပြုခဲ့သည်။

အဆိုပါ အဆိုပြုချက်များ ဆောင်ရွက်ရန် ကုမ္ပဏီများအနေဖြင့် ပူးပေါင်းသည့်ပုံစံ( Consortium) ဖြင့် ဆောင်ရွက်စေလိုပြီး မြေနေရာနှင့် အခြားလိုအပ်ချက်များအား တိုင်းအစိုးရများနှင့် ညှိနှိုင်းပေးမည်ဟု စီမံကိန်းနှင့် ဘဏ္ဍာရေးပြည်ထောင်စုဝန်ကြီး ဦးကျော်ဝင်းက  ၀န်ကြီးက ပြောသည်။ ထို့ပြင် တရုတ်နိုင်ငံသို့ ပြန်လည်တင်ပို့နိုင်ရေးအတွက် ဆောင်ရွက်ပေးမည်ဟု ပြောဆိုခဲ့သည်။

ဆွေးနွေးပွဲတွင် မွေးမြူရေးကဏ္ဍအပြင်  သစ်သီးဝလံ၊ ဆန်စပါး၊ လက်မှုလုပ်ငန်းနှင့် ဆီလုပ်ငန်းကဏ္ဍများ အဓိကထားဆွေးနွေးခဲ့ကြပြီး  စီမံကိန်းနှင့် ဘဏ္ဍာရေးပြည်ထောင်စုဝန်ကြီး ဦးကျော်ဝင်း၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုဝန်ကြီး ဦးအောင်ထူးတို့ တက်ရောက်ခဲ့သည်။

အဆိုပါ ဆွေးနွေးပွဲတွင် ၀ါးတန်းလမ်းကုန်စည်ဒိုင် အဆင့်မြှင့်တင်ရေးအပါအဝင် ကုန်ပစ္စည်း HS Code များ ပြင်ဆင်သတ်မှတ်ရေး အထိ လုပ်ငန်းကဏ္ဍ ၈ ခုကျော်အား ဆွေးနွေးခဲ့ကြသည်။ မွေးမြူရေး၊ သစ်သီးဝလံ၊ ဆန်စပါး၊ လက်မှုလုပ်ငန်းနှင့် ဆီလုပ်ငန်းကဏ္ဍများ၏ ကြံုတွေ့နေရသည့် လတ်တလောအခြေအနေနှင့် အခက်အခဲများ၊ ရေရှည်လုပ်ငန်းဆောင်ရွက်ရန်များအား စီးပွားရေးလုပ်ငန်းရှင်များ ဘက်က တင်ပြခဲ့ကြသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly