ပဲခူးတိုင်း ပြည်ခရိုင် ပြည်မြို့တွင် ယခုနှစ် ကျင်းပမည့် မဟာသင်္ကြန်ကို စည်းကမ်းတင်းကြပ်မှုများ ပြုလုပ်မည်မဟုတ်ဘဲ လွတ်လပ်ပျော်ရွှင်စွာဆင်နွဲနိုင်မည်ဟု ပြည်မြို့နယ် အုပ်ချုပ်ရေးမှူးရုံး မှတာဝန်ရှိသူတစ်ဦးက ပြောသည်။
"အရေးယူဖို့ အစီအစဉ်တွေဘာမှမရှိပါဘူး။ အရေးယူမယ်ဆိုရင်လည်း အမိန့်ထုတ်ပြီးမှလုပ်လို့ရမယ်"ဟု ပြည်မြို့နယ် အုပ်ချုပ်ရေးမှူးရုံးမှ ဦးမြင့်အောင်ကဆိုသည်။
အခြား မြို့နယ်များတွင် အရက်သေစာဖမ်းဆီး အရေးယူခြင်း၊ အိပ်ဇောဖြုတ်ဆိုင်ကယ်များဖမ်းဆီးခြင်း၊ သရုပ်ပျက်ဝတ်စားဆင်ယဉ်မှုများ တားဆီးခြင်း၊ သင်္ကြန်သံချပ်များကြပ်မတ်ခြင်းများ ရှိသော်လည်း ပြည်မြို့သင်္ကြန်တွင် လွတ်လပ်ခွင့်ပေးထားမည်ဖြစ်သည်။
ပြည်မြို့ပေါ်တွင် ပုဂ္ဂလိက မဏ္ဍပ် ၂၁ ခု၊ ကျေးရွာပုဂ္ဂလိက မဏ္ဍပ် ၃ ခု၊ ဗဟိုရ်မဏ္ဍပ် ၁ ခု စုစုပေါင်း မဏ္ဍပ် ၂၅ ခု ခွင့်ပြုပေးထားပြီး ဌာနဆိုင်ရာနှင့် ရပ်ကွက် မဏ္ဍပ်များမရှိပါ။
"အရင်နှစ်ထက်တော့မဏ္ဍပ်တွေ နည်းနည်းပိုလာတော့ ပိုစည်ကားမယ်ထင်တယ်"ဟု ဦးမြင့်အောင် က ပြောသည်။
သို့သော် ပြည်မြို့မှ အစည်ကားဆုံး စီးပွားဖြစ်သင်္ကြန်မဏ္ဍပ် ဖြစ်သည့် DRY SNAKE မဏ္ဍပ်ကို ပြည်မြို့ ဗဟိုရ်မီးသတ်ရှေ့မှ ပြည်ဘူတာရုံ အထွက်ပေါက်သို့ ပြောင်းရွှေ့ဖွင့် လှစ်ခဲ့ရသည်။
"နှစ်စဉ်နှစ်တိုင်း ပြည်သင်္ကြန်စည်ကားဖို့လုပ်နေရတာဖြစ်တဲ့ အတွက် လုပ်လက်စနေရာလေးကိုပဲပေးစေချင်တယ်။ အာဏာပိုင်အဖွဲ့အစည်းနဲ့ ဒေသခံရပ်မိရပ်ဖတွေက ဝိုင်းဝန်းကူညီ စီစဉ်ပေးစေချင်တယ်"ဟု ကိုအောင်ကြီးကဆိုသည်။
မဟာသင်္ကြန်ပွဲအတွက် ဒေသဆိုင်ရာအုပ်ချုပ်ရေးအဖွဲ့များ မတ်လ၃၁ ရက်က အစည်းအဝေးပြုလုပ်ခဲ့ပြီးဖြစ်သည်။ ဧပြီ၄ ရက်တွင် တိုင်းအစိုးရအဖွဲ့ရုံး၌ အစည်းအဝေး ထပ်မံ ပြုလုပ် ဦးမည်ဖြစ်သည်။