ကွာလာလမ်ပူ၊ ဖေဖော်ဝါရီ ၂၇ ။ ။ ပြီးခဲ့တဲ့သီတင်းပတ်က မြောက်ကိုရီးယားခေါင်းဆောင် ကင်ဂျုံးအွန်ရဲ့ ဖအေတူမအေကွဲအစ်ကိုဖြစ်သူ ကင်ဂျုံးနမ်ကို အမျိုးသမီးနှစ်ဦးက VX ဓာတုအဆိပ်နဲ့ လုပ်ကြံခဲ့ရာ ကွာလာလမ်ပူ အပြည်ပြည်ဆိုင်ရာလေဆိပ်က ဘေးကင်းလုံခြုံမှုရှိတယ်လို့ မလေးရှားရဲအဖွဲ့က ဖေဖော်ဝါရီ ၂၆ ရက်မှာ ကြေညာပါတယ်။
ရဲ၊ မီးသတ်အဖွဲ့နဲ့ နျူကလီးယားစွမ်းအင်ပညာရှင် ပူးပေါင်းအဖွဲ့က ကင်ဂျုံးနမ်တိုက်ခိုက်ခံရရာ လေဆိပ်တာမီနယ် ၂ မှာ စိစစ်မှုတွေ လုပ်ဆောင်ခဲ့ပြီးနောက် ကြေညာတာဖြစ်ပါတယ်။ ဓာတုလက်နက်မှာ ထည့်သွင်းအသုံးပြုတဲ့ အဆိပ်ဓာတ်ဖြစ်တဲ့ VX ဓာတုအဆိပ် အစအနကို မတွေ့ရှိကြောင်း ဆိုပါတယ်။
“ကျွန်တော်တို့တွေ စိစစ်မှုလုပ်ငန်းစဉ်တွေအရ အန္တရာယ်ဖြစ်စေတဲ့ ဓာတ်ပစ္စည်းတွေ လေဆိပ်မှာ မတွေ့ရှိပါဘူး။”လို့ ဆီနီဂေါပြည်နယ်ရဲချုပ် အဘ်ဒူဆာမတ်ရှ်က ပြောပါတယ်။
VX ဓာတုအဆိပ်ကို ၁၉၈၀ ခုနှစ်တွေက အီရတ်-အီရန်စစ်ပွဲတွေမှာ အသုံးပြုခဲ့ကြပါတယ်။ ဒီဓာတုရည်က အရောင်အဆင်းမရှိ အနံ့အရသာမရှိဘဲ ကမ္ဘာမှာ အပြင်းထန်ဆုံး ဓာတုဓာတ်တွေက တစ်ခုအပါအဝင်ဘဲ ဖြစ်ပါတယ်။
ဖေဖော်ဝါရီ ၁၃ ရက်က ကွာလာလမ်ပူလေဆိပ်မှာ ကင်ဂျုံးနမ်ကို အမျိုးသမီးနှစ်ဦး ချဉ်းကပ်ပြီး VX ဓာတုအဆိပ်နဲ့ မျက်နှာကို ပက်ဖျန်းခဲ့တာဖြစ်ပါတယ်။ ကင်ဂျုံးနမ်ဟာ ဆေးရုံအသွား လမ်းမှာတင် သေဆုံးခဲ့တာဖြစ်ပါတယ်။