ကြားဖြတ်ရွေးကောက်ပွဲ ဘယ်လိုမဲပေးကြမလဲ

ကြားဖြတ်ရွေးကောက်ပွဲ ဘယ်လိုမဲပေးကြမလဲ
နိုဝင်ဘာလ ၈ ရက်က ကျရောက်သည့် ၂၀၁၅ မြန်မာနိုင်ငံ ရွေးကောက်ပွဲနှင့် ရွေးကောက်ပွဲလွန် နိုဝင်ဘာလ ၉ ရက်နေ့က အခြေအနေများအားတွေ့ရစဉ်။ ဓာတ်ပုံ-ဟောင်ဆာ(ရာမည)
 

လာမယ့် ဧပြီ်လ ၁ ရက်နေ့မှာဖြင့် ကြားဖြတ်ရွေးကောက်ပွဲ ကျင်းပတော့မှာပါ။ နေရာအများဆုံး ဝင်ရောက်ယှဉ်ပြိုင်မယ့်ပါတီကလည်း တကယ်တော့ ပါတီကြီး ၂ ခုပါပဲ။ အမျိုးသားဒီမိုကရေစီအဖွဲ့ချုပ်နဲ့ ပြည်ထောင်စုကြံ့ခိုင်ဖွ့ံ့ဖြိုးရေးပါတီတို့ပဲဖြစ်ပါတယ်။ ကျန်တဲ့ပါတီတွေကတော့ ဒီပါတီကြီး ၂ ပါတီနဲ့ မယှဉ်နိုင်လောက်တဲ့အရေအတွက်နဲ့ ဝင်ရောက်ယှဉ်ပြိုင်ကြမှာပါ။ လစ်လပ်နေတဲ့ လွှတ်တော်အရပ်ရပ် နေရာ ၁၉ နေရာအတွက်ပြုလုပ်တဲ့ ကြားဖြတ်ရွေးကောက်ပွဲဖြစ်ပါတယ်။

ကြားဖြတ်ရွေးကောက်ပွဲအကြိုကာလ ဒီလိုအချိန်မှာ ပြီးခဲ့တဲ့ ၂၀၁၅ ရွေးကောက်ပွဲတုန်းကနဲ့ နှိုင်းယှဉ်ရင် မဲဆန္ဒရှင်များရဲ့ စိတ်ဝင်စားမှုဟာ တက်ကြွမှု အားနည်းလွန်းလှတယ်လို့ ဝေဖန်သူတွေကလည်း   ဝေဖန်ကြပါတယ်။ ဘာ့ကြောင့် စိတ်ဝင်စားမှု အားနည်းနေကြရတာလဲ။ မိမိတို့ မဲဆန္ဒရှင်တွေဟာ ကိုယ်ပိုင်တဲ့မဲပြားအပေါ် ထိရောက်မှုရှိ၊ မရှိ မသေချာတော့ဘူးလို့ ယူဆပြီး မတက်ကြွကြတော့တာ   ဖြစ်တယ်လို့လည်း မြင်တဲ့သူက မြင်ပါတယ်။ ၂၀၁၅ ရွေးကောက်ပွဲတုန်းက မျှော်လင့်တကြီး မဲပေးခဲ့ပေမယ့် ရွေးကောက်ပွဲပြီးနောက်ပိုင်းကာလအတွင်း တိုင်းပြည် ပြုပြင်ပြောင်းလဲရေးခရီး ကိုယ်ထင်ထားသလောက် ခရီးမရောက်ဘူးလို့ မြင်တဲ့အခါ တက်ကြွမှု ယုံကြည်မှု အားနည်းသွားကြတာလည်း ဖြစ်နိုင်တယ်လို့ မြင်တဲ့သူတွေကလည်း မြင်ကြပါတယ်။ ဒီကြားထဲ ပါတီကိုကြည့်ပြီး မဲပေးရမှာလား ပုဂ္ဂိုလ်ကြည့်ပြီး မဲပေးရမှာလားဆိုတဲ့ ပြဿနာကလည်း အရှိန်တက်လာပြန်တာ တွေ့ရပြန်ပါတယ်။

မည်သို့ပင်ဖြစ်စေ လစ်လပ်နေတဲ့ မဲဆန္ဒနယ် ၁၉ နေရာအတွက်တော့ ကြားဖြတ်ရွေးကောက်ပွဲ လုပ်ကြရမှာဖြစ်သလို သက်ဆိုင်ရာ နယ်မြေတွေက မဲဆန္ဒရှင်တွေဟာလည်း ဆန္ဒမဲပေးကြရတော့မှာကလည်း အသေအချာပါပဲ။ ဒါကြောင့်မို့ သက်ဆိုင်ရာ မဲဆန္ဒရှင်တွေဟာ ဒီအချိန်မှာ တွေဝေနေလို့ မဖြစ်တော့ပါဘူး။ ပြတ်သားရှင်းလင်းတဲ့အမြင် ရှိထားဖို့ လိုအပ်လာပါတယ်။

မိမိတို့တိုင်းပြည်မှာ တိုင်းပြည်ပြုပြင်ပြောင်းလဲမှုတွေ၊ တိုင်းပြည်တည်ဆောက်မှုတွေ၊ ငြိမ်းချမ်းရေး တိုင်းပြည်စည်းလုံးညီညွတ်ရေးနဲ့ တရားဥပဒေစိုးမိုးရေး အခြေအနေဟာ လက်ရှိဖွဲ့စည်းပုံ အခြေခံဥပဒေအပေါ် မူတည်လျက်ရှိပါတယ်။ ဘယ်အဖွဲ့အစည်း ဘယ်ပုဂ္ဂိုလ်မဆို လက်ရှိဖွဲ့စည်းပုံအခြေခံဥပဒေက ပေးထားတဲ့အခြေအနေအပေါ်တူတည်ပြီး လုပ်ကိုင်ရပါတယ်။ ဖွဲ့စည်းပုံအခြေခံဥပဒေရဲ့ နယ်မြေအဝန်းအဝိုင်း ကျယ်ရင်ကျယ်သလောက် ကျဉ်းရင်ကျဉ်းသလောက် လုပ်ကြရတဲ့သဘော ရှိပါတယ်။ ဖွဲ့စည်းပုံအခြေခံဥပဒေရဲ့အဝန်းအဝိုင်းကျယ်ရင် ကျယ်သလောက် လုပ်ကိုင်ဆောင်ရွက်လို့   အောင်မြင်နိုင်ပြီး ကျဉ်းရင် ကျဉ်းသလောက် အခက်အခဲမျိုးစုံ ကြုံတွေ့ရမှာ ဖြစ်ပါတယ်။

မိမိတို့တိုင်းပြည်မှာ ထင်သာမြင်သာတဲ့အခြေအနေတစ်ရပ်ကတော့ တရားဥပဒေစိုးမိုးမှု အားနည်းလှတဲ့အချက်ဖြစ်ပါတယ်။ တရားဥပဒေစိုးမိုးမှု အားနည်းတဲ့အတွက် အကျင့်ပျက် အဂတိလိုက်စားမှု မြင့်မားလာပြီး ရာဇဝတ်မှုတွေ ပိုမိုထူပြောလာရပါတယ်။ ပြည်သူတွေရဲ့လုံခြုံအေးချမ်းမှုကို ပိုပြီး ခြိမ်းခြောက်ပါတယ်။ ပြည်သူ တွေဟာ မိဘမဲ့တဲ့ ကလေးသူငယ်များသဖွယ် အားကိုးရာမဲ့ဖြစ်ကာ ကိုယ့်ကိုယ်ကို ယုံကြည်မှု အားနည်းလာရပြီး စီးပွားရေး၊ ပညာရေး၊ စည်းလုံးညီညွတ်ရေး၊ နိုင်ငံရေးရာကိစ္စအရပ်ရပ်မှာ ယိုင်နဲ့ပြိုလဲကျလုမတတ် ဖြစ်လာကြလေ့ ရှိပါတယ်။

ဒီလိုတွေဖြစ်လာရတဲ့ အခြေခံအကြောင်းရင်းကတော့ ဖွဲ့စည်းပုံအခြေခံဥပဒေရဲ့အားနည်းမှု၊ အခြေခံဥပဒေရဲ့ အဝန်းအဝိုင်း ကျဉ်းမြောင်းမှုနဲ့ ဒီမိုကရေစီစံချိန်စံညွှန်း မမီတဲ့ ဥပဒေများကြောင့်ပဲဖြစ်ပါတယ်။ တိုင်းပြည်တစ်ခုရဲ့ စီးပွားရေး၊ နိုင်ငံရေး၊ ပညာရေး၊ စည်းလုံးညီညွတ်ရေး အစရှိတဲ့ အခြေခံကျတဲ့ကိစ္စရပ်များ တိုးတက်အောင်မြင်မှုဟာ အဲဒီသက်ဆိုင်ရာတိုင်းပြည်ရဲ့ ဖွဲ့စည်းပုံအခြေခံဥပဒေအပေါ်မှာ လုံးလုံးမူတည်ပါတယ်။

အနီးကပ်ဆုံးဥပမာပေးရရင် ဒီကနေ့ တိုင်းပြည်ပြုပြင်ပြောင်းလဲမှုကိစ္စ အဖုအထစ်ဖြစ်နေရတာ၊ ငြိမ်းချမ်းရေးရဖို့ အခက်အခဲဖြစ်နေရတာ၊ ဖွံဖြိုးတိုးတက်မှုအတွက် အဟန့်အတားဖြစ်နေရတာဟာ ဘယ်သူ့ဘယ်သူအပေါ်မှ အဓိက မူမတည်ပဲ လက်ရှိ ဖွဲ့စည်းပုံအခြေခံဥပဒေရဲ့အားနည်းချက်များကြောင့်ပဲ ဖြစ်ပါတယ်။

ဒါကြောင့်မို့ မိမိတို့မဲဆန္ဒရှင်များဟာ ကြားဖြတ်ရွေးကောက်ပွဲမှာ ဘယ်ပါတီ ဘယ်ပုဂ္ဂိုလ်ကို မဲပေးရွေးချယ်ကြမလဲလို့ စဉ်းစားရင် အဲဒီ ဖွဲ့စည်းပုံအခြေခံဥပဒေ ပြင်ဆင်ရေး တကယ်ဆောင်ရွက်ပေးနိုင်မယ့်၊ တကယ်လည်း တောင်းဆိုနေတဲ့ ပါတီနဲ့ ပုဂ္ဂိုလ်များကိုသာ ပြတ်ပြတ်သားသား ရွေးချယ် မဲပေးကြဖို့သင့်ပါတယ်။ တိုင်းပြည်ပြုပြင်ပြောင်းလဲမှုလုပ်ငန်းများ အောင်မြင်အောင်ဆောင်ရွက်နိုင်ရေးအတွက် မှန်ကန်စွာ မဲပေးနိုင်တဲ့နည်းကိုဖြင့် ရှင်းလင်ပြတ်သားစွာ ကိုင်ဆွဲနိုင်ပါစေကြောင်း  မဇ္ဈိမက အကြံပေးတိုက်တွန်း နှိုးဆော်လိုက်ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required