ရန်ကုန်၊ဖေဖော်ဝါရီ ၉ ။             ။ အပစ်ရပ်စာချုပ် NCA ကို လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့များရှိရာ ဒေသများတွင် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲလေ့လာစောင့်ကြည့်ရေးဒေသန္တရ အဖွဲ့များကို ဘတ်ဂျတ်ကျပြီးမှ ဖွဲ့စည်းပေးသွားမည်ဟု JMCU မှ အတွင်းရေးမှူး (၁) ဒေါက်တာရွှေခါး က ပြောသည်။

ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲလေ့လာစောင့်ကြည့်ရေးကော်မတီ (JMC) ၏ ကိုးကြိမ်မြောက် ဆွေးနွေးပွဲအပြီးတွင် မီဒီယာများကို ပြောကြားခဲ့ခြင်းဖြစ်သည်။

"သက်ဆိုင်ရာ JMCS (တိုင်းနှင့်ပြည်နယ်အဆင့် ပစ်ခတ်တိုက်ခိုက်မှုရပ်ဆဲရေးဆိုင်ရာ ပူးတွဲလေ့လာစောင့်ကြည့်ရေးကော်မတီ) တွေကနေ ဒေသန္တရအဆင့် JMC ကို ဘယ်နေရာမှာ လုပ်သင့်တယ် ဆိုပြီးတော့ သူတို့ဒေသအလိုက် တင်ပြထားတာ ရှိပါတယ်။ ဒါပေမဲ့ သူတို့တင်ပြထားတဲ့ဟာမှာလည်း ၁၀ ခုထက်မက ရှိနေတယ်ပေါ့" ဟု ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲလေ့လာစောင့်ကြည့်ရေးကော်မတီ (JMC) ၏ အတွင်းရေးမှူး (၁) ဒေါက်တာရွှေခါး ကပြောသည်။

အဆိုပါဒေသန္တရ ပူးတွဲလေ့လာစောင့်ကြည့်ရေးအဖွဲ့ များတွင် လေ့လာစောင့်ကြည့်ရေးအတွက် အရပ်သား လုပ်အားပေးများကို ခန့်အပ်သွားမည်ဖြစ်ပြီး မည်သည့်နေရာဒေသတွင် ဒေသန္တရ JMC အဖွဲ့များ ထားရှိမည်ကို မဆွေးနွေးရသေးသော်လည်း ၁၀ နေရာအထိ ထားရှိသွားမည်ဖြစ်ကြောင်းသိရသည်။

ဒေသန္တရ JMC အဖွဲ့များအတွက် ကုန်ကျစရိတ်ကို ပစ်ခတ်ရပ်စဲမှုလေ့လာစောင့်ကြည့်ရေးကော်မတီ (JMC) ဘတ်ဂျက်ထဲမှ ကျခံသွားမည်ဟု သိရသည်။