ပန်းတွေ ကြွေလွန်းတဲ့ ရာသီ

ပန်းတွေ ကြွေလွန်းတဲ့ ရာသီ
 

လူချစ်လူခင်ပေါများပြီး မြန်မာစာပေနယ်ပယ်အတွက် ခွန်အားစိုက်ထုတ်မှုကြီးမားသူ ကဗျာဆရာ မောင်စိမ်းနီ ယမန်နေ့က ကွယ်လွန်ကြောင်းသတင်းကို ဒီကနေ့ အင်တာနက်လူမှုကွန်ရက်တွင် ဖတ်ကြရသည်။

ကြုံကြိုက်တုန်း ပြောရလျင် အမိနိုင်ငံ အာဏာရှင်စနစ်မှသည် ဒီမိုကရေစီစနစ်သို့ ကူးပြောင်းနိုင်ရေး ကြိုးပမ်းကြသူတွေထဲတွင် စာပေသမားများဖြစ်ကြသည့် ကဗျာဆရာများ၊ စာရေးဆရာများသည်   မြင့်မားထိရောက်သည့် အခန်းကဏ္ဍတစ်ခုမှ ပါဝင်ခဲ့ကြသည်ကို မည်သူမျှ မငြင်းနိုင်ပါ။

တကယ်တော့ ၁၉၆၂ ခုနှစ်မှစပြီး မိမိတို့တိုင်းပြည်တွင် အာဏာရှင်စနစ် ပေါ်ထွန်းလာသောအခါ မြန်မာစာပေနယ်ပယ်တွင် ယင်းအာဏာရှင်စနစ်အား အကျိုးပြုသူစာပေပညာရှင်နှင့် ယင်း အာဏာရှင်စနစ်အား ဆန့်ကျင်သူ စာပေပညာရှင်ရယ်လို့ စာပေပညာရှင် နှစ်မျိုးနှစ်စား ကွဲပြားလာခဲ့သည်မှာ ယခုအချိန်အထိပင်ဖြစ်သည်။

အာဏာရှင်စနစ်ဘက်မှရပ်တည်သည့် စာပေပညာရှင်များထဲတွင် ယင်းအာဏာရှင်စနစ်အား အတိအလင်းထောက်ခံသူ စာပေပညာရှင်များ ရှိသလို ထောက်ခံလို့   ထောက်ခံမှန်းမသိအောင်   ထောက်ခံမိလျက်သားဖြစ်နေသည့် စာပေပညာရှင်များလည်း ရှိခဲ့ပါသည်။ အာဏာရှင်စနစ်ကို အတိအလင်းထောက်ခံသူများကို စာဖတ်သူများက အတိအလင်း ထင်သာမြင်သာစွာ  မြင်နိုင်မည်   ဖြစ်သော်လည်း ယင်း အာဏာရှင်စနစ်အား ထောက်ခံလို့ ထောက်ခံမှန်းမသိအောင် ထောက်ခံကြသူ စာပေပညာရှင်များကိုမူ စာဖတ်သူများအနေနှင့် လွယ်ကူစွာ မြင်နိုင်ကြမည် မဟုတ်ချေ။ စာဖတ်သူများအနေဖြင့် စာပေဝမ်းစာ နိုင်ငံရေးဝမ်းစာနှင့် သမိုင်းဝမ်းစာ တစ်စုံတရာ အခံရှိမှသာ အာဏာရှင်စနစ်ကို မသိမသာ ထောက်ခံနေကြသည့် ယင်းသို့သော စာပေပညာရှင်များကို ထင်လင်းစွာ ခွဲထုတ်သိမြင်နိုင်ကြမည်ဖြစ်သည်။

ကွယ်လွန်သူ ကဗျာဆရာ မောင်စိမ်းနီသည် အာဏာရှင်စနစ်ဆန့်ကျင်ရေးသမား၊ ဒီမိုကရေစီလိုလားသူ ကဗျာဆရာတစ်ယောက်ဖြစ်သည်။ ၁၉၇၀ ခုနှစ်တဝိုက်လောက်ကစပြီး အာဏာရှင်ခေတ်ကို မီးမောင်းထိုးပြသည့် ကဗျာများရေးဖွဲ့ခြင်း၊ အာဏာရှင်ခေတ်၏ အတွင်းသရုပ်ကိုဖွင့်ချဖေါ်ထုတ်သည့် ကဗျာစာအုပ်များ ထုတ်ဝေခြင်း၊ ခေတ်ပေါ်ကဗျာဆရာများ ပေါ်ထွန်းရေး အားကြိုးမာန်တက်   ဆောင်ရွက်သည့် ကဗျာဆရာ အယ်ဒီတာတစ်ဦးဖြစ်ခြင်း အစရှိသော ဂုဏ်အဂါီများဖြင့် ပြည့်ဝသူ ကဗျာဆရာတစ်ဦးဖြစ်သည်။ အာဏာရှင်စနစ်အောက်က ပြည်သူတွေ၏ ခံစားချက်များ၊ ဘဝများကို ကဗျာများရေးဖွဲ့ခဲ့သူ ပြည်သူ့ဘက်တော်သား ကဗျာဆရာဖြစ်သည်။

ကဗျာဆရာ မောင်စိမ်းနီ၏ အထင်ရှားဆုံးကြိုးပမ်းချက်မှာ “ပိတောက်ပွင့်သစ် မဂ္ဂဇင်း” ကို အောင်မြင်စွာ ဦးစီးထုတ်ဝေခဲ့သူဖြစ်သည့် ကြိုးပမ်းချက်ပင်ဖြစ်သည်။ ယင်း ပိတောက်ပွင့်သစ် မဂ္ဂဇင်းမှာ   ခေတ်ပေါ်ကဗျာဆရာများ၊ လူငယ်ကဗျာဆရာများ၊ အာဏာရှင်ဆန့်ကျင်ရေး ကဗျာဆရာ၊ စာရေးဆရာများ အားကိုးအားထားပြု ဝင်ရောက်ရေးသားရာ ထင်ရှားသည့် မဂ္ဂဇင်းဖြစ်လာခဲ့ပါသည်။ ထို့ပြင် ကျဆုံးလျက်ရှိသည့် ရသစာပေ ပြန်လည်ခေါင်းမော့လာစေရေး အထူးကြိုးပမ်းခဲ့သည့် မဂ္ဂဇင်းတစ်ခုလည်း ဖြစ်ခဲ့သည်။

ကမ္ဘာအရပ်ရပ်က တော်လှန်ရေးစာပေသမားများ၊ ကမ္ဘာအရပ်ရပ်က အာဏာရှင်ဆန့်ကျင်ရေး စာပေသမားများ၏ ဘဝများနည်းတူ ကဗျာဆရာမောင်စိမ်းနီသည် အပြောင်းအလဲများလှ ဘဝကြမ်းကို   ဖြတ်သန်းရခြင်း၊ အာဏာရှင်တို့၏ အကျဉ်းထောင်အတွင်း ဖမ်းဆီးထောင်ချခံရခြင်း၊ ဆင်းရဲပင်ပန်းစွာ ရပ်တည်ရုန်းကန်ရခြင်းများဖြင့် ပြည်သူ့ကဗျာဆရာတစ်ဦး၏ဘဝကို ခုံမင်မြတ်နိုးစွာပိုက်ပွေ့ရင်း ကွယ်လွန်ခဲ့ပြီ ဖြစ်သည်။

ယခုရက်များအတွင်း ဦးကိုနီ ကဲ့သို့သော ပြည်သူချစ်သည့် ဥပဒေပညာရှင်တစ်ယောက် လုပ်ကြံသတ်ဖြတ်ခံရခြင်း၊ တာဝန်သိ နိုင်ငံ့သားကောင်း ဦးနေဝင်း ကြေကွဲစွာ ကွယ်လွန်ရခြင်းများဖြင့် မိမိတို့အဖို့ စိတ်ဝမ်းမချမ်းမြေ့ ဖြစ်နေရစဉ်မှာပင် ယခုအခါ ပြည်သူ့အကျိုးလိုလားသူ ကဗျာဆရာ မောင်စိမ်းနီ ရုတ်တရက် ကွယ်လွန်သည့်သတင်းကို ကြားကြရပြန်သည်။

မိမိတို့နိုင်ငံ အာဏာရှင်စနစ် ချုပ်ငြိမ်းပြီး ပြည်သူတို့ လိုလားသော ဒီမိုကရေစီစနစ်ထွန်းကားရေးအတွက် ပေးဆပ် ရင်းနှီးရသည့် အရင်းအနှီးသည်ကား ကြီးမားလှပါသည်။ နိုင်ငံ့ သားကောင်းများ ဆုံးရှုံးမှုမှာလည်း ကြီးမားလှပါသည်။

ပြည်သူချစ်သော စာပေသမား ကဗျာဆရာတစ်ဦး ယခုလိုကွယ်လွန်သွားခြင်းအတွက် မဇ္ဈိမက အထူးပင် ကြေကွဲဝမ်းနည်း နှမျောတသဖြစ်ရပါကြောင်း ဖော်ပြအပ်ပါသည်။ ကဗျာဆရာ ကွယ်လွန်ခြင်းဖြစ်သည်မို့ ကဗျာဆန်ဆန် နိဂုံးချုပ်ရပါလျင် မိမိတို့နိုင်ငံ ဒီမိုကရေစီအကူးအပြောင်းကာလကို “ပန်းတွေ ကြွေလွန်းသည့်ရာသီ”အဖြစ် တင်စားပြောဆိုရမည်သာ ဖြစ်ပါကြောင်းကိုလည်း ထပ်လောင်းဖော်ပြအပ်ပါသည်။

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required