ရန်ကုန်၊ ဇန်နဝါရီ ၂၄ ။ ။ ရှမ်းပြည်နယ်(အရှေ့ပိုင်း)၊ မိုင်းပေါက်မြို့နှင့် ပတ်ဝန်းကျင်ကျေးရွာများတွင် UWSA “ဝ” အဖွဲ့မှ တပ်သားသစ် စုဆောင်းခြင်းမရှိဟု “ဝ”အဖွဲ့ (UWSA) လားရှိုးတာဝန်ခံ ဦးညီရန်းက ဇန်နဝါရီ ၂၄ရက်တွင် ပြောသည်။
ရှမ်းပြည်နယ်(အရှေ့ပိုင်း)၊ မိုင်းပေါက်မြို့နှင့် ပတ်ဝန်းကျင်ကျေးရွာများတွင် UWSA “ဝ” အဖွဲ့က အတင်း အဓမ္မ လူသစ်စုဆောင်းမှုများကြောင့် ဒေသခံပြည်သူအချို့နေရပ် စွန့်ခွာလာရသည်ဟု တပ်မတော်ကာကွယ်ရေး ဦးစီးချုပ်ရုံး၏ ထုတ်ပြန်ခဲ့ပြီး “ဝ” တပ်ဖွဲ့ဘက်မှ ယနေ့ ငြင်းဆိုသည်။
“ကျွန်တော်ကနေပြီးမှ တပ်ဖွဲ့အသစ် စုဆောင်းတယ်ဆိုတာမရှိပါဘူး ကျွန်တော်တို့ဒေသအတွက် ကျွန်တော်တို့ တပ်ဖွဲ့တွေက လုံလောက်မှုရှိပါပြီ “ ဟု “ဝ”အဖွဲ့ (UWSA) လားရှိုးတာဝန်ခံ ဦးညီရန်းက ပြောသည်။
မိုင်းပေါက်မြို့နှင့် ပတ်ဝန်းကျင်ကျေးရွာများ၌ UWSA “ဝ” အဖွဲ့မှ လူသစ်စုဆောင်းမှုရှိနေပြီး ယင်းဒေသမှ ဒေသခံမိသားစုဝင် ၁၀ ဦးတို့သည် ဇန်နဝါရီ ၂၃ ရက် နံနက်ပိုင်းတွင် မိုင်းဖြတ်မြို့သို့ ထွက်ပြေးလာကြောင်း တပ်မတော်ကာကွယ်ရေးဦးစီးချုပ်ရုံးမှ ယနေ့(ဇန်နဝါရီ ၂၄)ထုတ်ပြန်ထားသည်။
ထိုသို့ လူသစ်စုဆောင်းရာတွင် UWSA “ဝ” အဖွဲ့သည် ကျေးရွာများရှိ အသက် ၁၂ နှစ်အထက်ရှိသူများအား စစ်မှုမထမ်းမနေရ အမိန့် ထုတ်ပြန်ထားသဖြင့် ထွက်ပြေးတိမ်းရှောင်လာခြင်းဖြစ်ကြောင်း တပ်မတော်ကာကွယ်ရေး ဦးစီးချုပ်ရုံးထုတ်ပြန်ချက်တွင် ပါရှိသည်။
အသက် ၁၂ နှစ်အထက်ရှိသူများနှင့် ပက်သက်ပြီး လားရှိုးတာဝန်ခံ ဦးညီရန်းက “ ၁၀ နှစ်ဝန်းကျင် ဥပမာ မိဘမဲ့ကလေးတွေ ကျောင်းမတက်နိုင်တဲ့ကလေးတွေ ဘော်ဒါလိုပုံစုံမျိုးနဲ့ကျောင်းဖွင့်ပေးတယ်။ ပညာသင်ပေးတယ်။ အဲ့ဒါမျိုး ရှိပါတယ် ” ဟု ပြန်လည်ပြောဆိုသည်။
UWSP/UWSA သည် တပ်မတော်အစိုးရနှင့် ၁၉၈၉ ခုနှစ် မေလတွင် အပစ်အခတ်ရပ်စဲခဲ့ပြီး၊ ယင်းနောက်တွင် တိုက်ပွဲများပြန်လည်ဖြစ်ပွားကာ၊ ယခင်အစိုးရနှင့် ၂၀၁၁ခုနှစ် စက်တင်ဘာ ၆ရက်တွင် အပစ်အခတ်ရပ်စဲရေး ပထမဆုံးသဘောတူခဲ့သည့် အဖွဲ့လည်းဖြစ်သည်။
