ဆက်သွယ်ရေး ဥပဒေပြင်ဆင်ရေး လူထုလှုပ်ရှားမှု ဟောပြောပွဲအား ဇန်နဝါရီ (၂၂) ရက်နေ့၊ ညနေ(၃)နာရီမှ(၅)နာရီအထိ ရန်ကုန်မြို့ မဟာဗန္ဓုလပန်းခြံ မြို့တော်ခန်းမရှေ့တွင် ဟောကြားမည်ဖြစ်ကြောင်း တရားလွှတ်တော်ရှေ့နေ ဦးရောဘတ်စန်းအောင်က မဇ္ဈိမသို့ ပြောသည်။
“ ၆၆(ဃ) ဆက်သွယ်ရေး ဥပဒေနဲ့ ပတ်သက်တဲ့ ကိစ္စဟောမှာပါ ။ ဒီဥပဒေဟာ ကုလသမဂ္ဂ လူအခွင့်အရေး ကြေညာစာတမ်းအပိုဒ်(၁၉)နဲ့၊ ဖွဲ့စည်းပုံအခြေခံ ဥပဒေ(၃၅၄)မှာ နိင်ငံသားတစ်ယောက်ရဲ့ အခွင့်အရေး လူအခွင့်အရေးကို ချိုးဖောက်ရာရောက်တယ်လို့ ကျွန်တော်တို့က ယုံကြည်တယ်။ ဘာဖြစ်လို့လဲဆိုတော့ ဆဲတာဆိုတာပဲဖြစ်ဖြစ်၊ ရာဇသတ်ကြီးမှာ ပါပါတယ်။ အသရေပျက်စေတယ်ဆိုလည်း ရာဇသတ်ကြီးမှာပါတယ်။ ရာဇသတ်ကြီးမှာ ပါနေပါလျက်သားနဲ့ ဒီပုဒ်မနဲ့ ဆွဲသွင်းတယ်ဆိုတာကိုက လက်စားချေတယ် သဘောဖြစ်နေတယ် ။ ဥပဒေဆိုတာ လက်စားချေခြင်း မဟုတ်ဘူး။ အပြုပညာပေး ဖလှယ်ရေးဖြစ်တယ်၊ လက်တွေ့ဥပဒေကို ပြဌာန်းရတဲ့ ရည်ရွယ်ချက်တွေနဲ့ မကိုက်ညီဘူး။ လက်တွေ့ဥပဒေကို ပြဌာန်းတဲ့ ရည်ရွယ်ချက်တွေနဲ့လည်း မကိုက်ညီဘူး၊ တိုင်းပြည်ဖွံ့ဖြိုးတိုးတက်ဖို့အတွက် ပြဌာန်းတဲ့ဥပဒေက လူတွေကို အချုပ်ထောင်ထဲကိုရောက်အောင် လုပ်နေသလိုဖြစ်နေတယ်။ ဒါလူအခွင့်အရေး စံချိန်စံညွှန်းနဲ့ မကိုက်ညီဘူး။ အဲ့ဒီတော့ ဒါကိုပြင်ဖို့လိုအပ်နေတယ်” ဟု တရားလွှတ်တော်ရှေ့နေ ဦးရောဘတ်စန်းအောင်ကပြောသည်။
၎င်းမှဆက်လက်၍ “ နောက်တစ်ချက်က ကျွန်တော်တို့နိင်ငံမှာ ဆိုက်ဘာဥပဒေ(Cyber Law)ဆိုတာ မရှိဘူး။ ဆက်သွယ်ရေးဥပဒေက ဆိုက်ဘာလော(Cyber Law) မဟုတ်ဘူး။ ဒါကြောင့် ဒီဥပဒေ ဒီပုဒ်မအတွက် ကျင့်သုံးရမယ့် နည်းဥပဒေကို ကနေ့ဆိုရင် (၄)နှစ်ထဲ ရောက်နေပြီ ။ အခုအထိ မပြဌာန်းရသေးဘူး ဖြစ်နေတယ် ။ ရုံးတွေမှာ ဖြစ်နေတာက ကြုံသလို ဒီအမှုအတွက်စစ်နေတယ်။ နောက်တစ်ချက်က ဒီအမှုနဲ့ ပတ်သက်ပြီးတော့ ဥပမာ တရားလိုနဲ့ တရားခံ ကျေအေးလို့၊ ကျေနပ်လို့ ရုတ်သိမ်းတယ်ဆိုရင်လည်း တရားစွဲ ၊ အဖွဲ့အစည်း မဟုတ်တဲ့ ပိုဆောင်ရေးနဲ့ ဆက်သွယ်ရေးဝန်ကြီးဌာနရုံး၊ ခွင့်ပြုချက် ယူရမယ်ဆိုပြီးတော့ အခုတရားရုံးတွေမှာ ရောဂါအသစ်အဆန်း ထနေတယ် ။ အဲ့ဒီတော့ ရာဇဝတ်ကျင့်ထုံးဥပဒေ ပုဒ်မ(၅)မှာပါတဲ့ ပြဌာန်းချက်နဲ့ လုံးဝမကိုက်ညီဘူး။ ဒီဥပဒေရဲ့ ပျော့ကွက် ဟာကွက် အားနည်းချက်တွေကြောင့် ဒီပုဒ်မနဲ့ တရားစွဲဆိုခံရတဲ့သူတွေ အလွန်နစ်နာနေတယ်။ ကုရာနတ္ထိ ဆေးမရှိသလို ဖြစ်နေတယ် ၊တရားစွဲအဖွဲ့အစည်းနဲ့ မသက်ဆိုင်တဲ့ ပိုဆောင်ရေးနဲ့ဆက်သွယ်ရေးဝန်ကြီးဌာနက သူ့ရဲ့ ခွင့်ပြုချက်ပေးပြီး စွဲတာဖြစ်လို့ ရုပ်သိမ်းရင်လဲ သူဌာနရဲ့ ခွင့်ပြုချက်နဲ့ ရုတ်သိမ်းရမယ်လို့ ပညတ်ထားတော့ ဒီဥပဒေဟာစံချိန်စံညွှန်းနဲ့ မကိုက်ညီပါဘူး။ နိင်ငံသားတွေရဲ့အခွင့်အရေးကို ဆုံးရှုံးစေပါတယ် ။ လူမှုကွန်ရက် စာမျက်နာမှာ အသိဉာဏ် ခေါင်းပါးတဲ့ လူတစ်ချို့ကြောင့်ဘာမှမဆိုင်တဲ့သူတွေ နစ်နာနေတယ် ။ SMS Viber Messenger သုံးတယ် ။ ၆၆နဲ့ ညှိနေတယ် ။ အဲ့ဒါမဟုတ်တော့ဘူးဗျ။ ဒါကြောင်မလို့ ဒီဟာ လတ်တလော အခြေအနေမှာ လွှတ်တော်နှစ်ရပ်က ပြင်ဆင်ပယ်ဖြတ်ရေးကိုဦးတည်သွားပြီးတော့ အဆုံးတိုင် ရည်မှန်းချက်က ဒီပုဒ်မကိုဖျက်ဖို့ပဲ။ အဲ့ဒါကြောင့်မလို့ ကျွန်တော်တို့က လူထုလှုပ်ရှားမှုကို ခန်းမရှေ့မှာ လုပ်မှာပါ။
ဆက်သွယ်ရေး ဥပဒေပြင်ဆင်ရေး လူထုလှုပ်ရှားမှု ဟောပြောပွဲတွင် တရားလွှတ်တော်ရှေ့နေ ဦးရောဘတ်စန်းအောင်၊ အိုင်တီပညာရှင် ဦးစိုးသီဟအောင်၊မြန်မာဂျာနယ်လစ်ကွန်ရက်မှ ဦးဇေယျာလှိုင်နှင့် ဆက်သွယ်ရေးဥပဒေကြောင့် နစ်နာသူများဖြစ်သော ကိုရာပြည့်နှင့်ကိုဆောင်းခတို့ ဟောပြောမည်ဖြစ်ကြောင်း သိရှိရသည်။
