ဇန်နဝါရီ ၁၃ ။ ။ ဘင်္ဂလားဒေ့ရှ်နိုင်ငံသည် အိမ်နီးချင်းနိုင်ငံများအား ဆန့်ကျင်သည့် အကြမ်းဖက်လုပ်ရပ်အတွက် ပိုင်နက်နယ်မြေကို အသုံးပြုခွင့်ပေးမည် မဟုတ်ကြောင်း ဘင်္ဂလားဒေ့ရှ်ဝန်ကြီးချုပ်က မြန်မာနိုင်ငံအထူးကိုယ်စားလှယ်အဖွဲ့နှင့်တွေ့ဆုံစဉ် ပြောသည်။
နိုင်ငံတော်အတိုင်ပင်ခံပုဂ္ဂိုလ်၏ အထူးကိုယ်စားလှယ်အဖြစ် နိုင်ငံခြားရေးဝန်ကြီးဌာန ၊ ဒုတိယဝန်ကြီး ဦးကျော်တင်သည် ဘင်္ဂလားဒေ့ရှ်နိုင်ငံသို့ ဇန်နဝါရီလ ၁၁ ရက်မှ ၁၂ ရက်အထိ သွားရောက်ခဲ့ပြီး ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာ အား တွေ့ဆုံခဲ့သည်။
တွေ့ဆုံမှုတွင် နယ်စပ်တစ်လျှောက် ငြိမ်းချမ်းမှုနှင့် လုံခြုံမှုထိန်းသိမ်းရေး၊ အကြမ်းဖက်သမားများ စိမ့်ဝင်လာမှုကို တားဆီးနိုင်ရေးတို့အတွင် သတင်းအချက်အလက်ဖလှယ်ရေးမှာ အရေးကြီးကြောင်း နှစ်ဘက်လုံးက အလေးထားပြောခဲ့ကြသည်ဟု နိုင်ငံခြားရေးဝန်ကြီးဌာနမှ ထုတ်ပြန်သည်။
ပြီးခဲ့သည့်နှစ် အောက်တိုဘာလ ၉ ရက်၊ မြန်မာနယ်ခြားစောင့်ရဲစခန်းများတိုက်ခိုက်ခံရမှုဖြစ်စဉ်နောက်ပိုင်း မြန်မာနိုင်ငံဘက်မှ ထွက်ပြေးလာသည်ဟု ဆိုသူများအား စနစ်တကျ စိစစ်အတည်ပြုနိုင်ရေးနှင့် ပြန်လည်ခေါ်ဆောင်ရေး လုပ်ငန်းစဉ်များအတွက် ဆွေးနွေးမှုများ စတင်ရန်သဘောတူခဲ့ကြသည်ဟု နိုင်ငံခြားရေးဝန်ကြီးဌာနမှ ယမန်နေ့က ထုတ်ပြန်သည်။
