ယနေ့ည ၆းဝဝ နာရီက လူငယ်လေ့ကျင့်ရေးစင်တာ YTC (သုဝဏ္ဏကွင်း)တွင်ကစားခဲ့သော ၂၀၁၇ အာရှယူ-၁၉ ချန်ပီယံရှစ် အမျိုးသမီးခြေစစ်ပွဲ အုပ်စုနောက်ဆုံးပွဲစဉ်တွင် အိမ်ရှင် မြန်မာယူ-၁၉ အမျိုးသမီးအသင်းသည် ထိုင်းအသင်းကို ၁-၂ ဂိုးဖြင့်အရေးနိမ့်သွား၍ ခြေစစ်ပွဲကျရှုံးခဲ့ရသည်။
ခြေစစ်ပွဲတစ်အုပ်စုလျှင်ထိပ်ဆုံးတစ်သင်းသာ ခြေစစ်ပွဲအောင်မည်ဖြစ်ပြီး ထိုင်းအသင်းက အုပ်စုတွင်းသုံးပွဲစလုံးအနိုင်ရကာ ခြေစစ်ပွဲ အောင်မြင်သွားခြင်းဖြစ်သည်။ မြန်မာအသင်းမှာ နှစ်ပွဲနိုင်၊ တစ်ပွဲရှုံး၊ အုပ်စု ဒုတိယနေရာဖြင့်သာ ကျေနပ်ခဲ့ရသည်။
ထိုင်းအသင်းအတွက် ဂိုးများကို ပွဲချိန် ၃၄ မိနစ်တွင် Kanyanat နှင့် ပွဲချိန် ၄၇ မိနစ်တွင် Jiraporn တို့ကသွင်းယူခဲ့ပြီး မြန်မာအသင်းအတွက်ဂိုးကို ပွဲပြီးကာနီးထပ်ဆောင်းအချိန်ပိုတွင် ဂျူလိုင်ကျော်က သွင်းယူခဲ့သည်။
