ကဘူးလ်၊ အောက်တိုဘာ ၂၄ ။ ။ အာဖဂန်နစ္စတန်နိုင်ငံ၏ ပြီးခဲ့သည့်နှစ်က ဘိန်းအထွက်နှုန်းသည် ၄၃ ရာခိုင်နှုန်းအထိ မြင့်တက်ခဲ့ကြောင်း ကုလသမဂ္ဂက ပြောသည်။ နိုင်ငံ၏ ဘိန်းစိုက်မြေ ပမာဏမှာလည်း ၁၀ ရာခိုင်နှုန်းမြင့်တက်ကာ ဟတ်တာ ၂၀၁၀၀၀ အထိ များပြားခဲ့ကြောင်း ကုလသမဂ္ဂ မူးယစ်ဆေးဝါးနှင့် ရာဇဝတ်ဆိုင်ရာရုံး UNODC က ထုတ်ပြန်သည်။
သို့သော်လည်း ကောင်းမွန်သည့် စိုက်ပျိုးမှုကြောင့် တစ်ဟတ်တာအထွက်နှုန်းမြင့်မားခြင်းကြောင့် ယခုကဲ့သို့ အလွန်အကျွံအထွက်တိုးများခဲ့ခြင်းဖြစ်သည်။
အာဖဂန်နစ္စတန်နိုင်ငံသည် ကမ္ဘာ့ပေါ်တွင် ဘိန်းဖြူချက်လုပ်သည့် ဘိန်းထွက်ရှိမှုအများဆုံးနိုင်ငံဖြစ်သည်။
နိုင်ငံအတွင်း ဘိန်းစိုက်ပျိုးမှုကို ရာဇဝတ်မှုအဖြစ် ပြဌာန်းထားသော်လည်း ဆင်းရဲနုံချာသော တောင်သူလယ်သမားများအတွက်က အဓိကဝင်ငွေရစေသည့် စိုက်ပျိုးမှုဖြစ်နေဆဲဖြစ်သည်။
တာလီဘန်များကလည်း ၎င်းတို့ထိန်းချုပ်ရာနယ်မြေဒေသများတွင် ဘိန်းခွန်ကောက်ခံနေကာ ၎င်းတို့၏ စစ်ရေးလှုပ်ရှားမှုအတွက် အဓိကဝင်ငွေအဖြစ် ဖြည့်ဆည်းနေခြင်းဖြစ်သည်။
