ပဲတိီစိမ်း အထွက်တိုးဖို့ နည်းမှန်လမ်းမှန် စိုက်ကြစို့

14 October 2016
ပဲတိီစိမ်း အထွက်တိုးဖို့ နည်းမှန်လမ်းမှန် စိုက်ကြစို့

ပဲတီစိမ်းကတော့ ရေမွှေးဓာတ် စနယ်မြေ နှုန်းမြေ စတဲ့ မြေတွေမှာဆိုရင် ပိုမိုဖြစ်ထွန်းပါတယ်။ မြေကြီးရဲ့ ချဉ်ဖန်ဓာတ်က ph 5.5 နဲ့ 6.5 တွေမှာဆိုရင် ပိုမိုဖြစ်ထွန်းပါတယ်။ ဒါပေမယ့် စိုက်ပျိုးတဲ့အချိန်ကတော့ အရေးကြီးပါတယ်။

 မြန်မာနိုင်ငံ အထက်ပိုင်းဒေသတွေမှာ ဆိုရင် မိုးကြိုကာလအဖြစ် ဖေဖော်ဝါရီလလယ်မှ မတ်လအလယ်ထိ စိုက်ပျိုးနိုင်ပါတယ်။ မြန်မာနိုင်ငံ အောက်ပိုင်း ဒေသတွေမှာဆိုရင် မိုးနှောင်းရာသီ စပါးရိတ်သိမ်းပြီးချိန် နိုဝင်ဘာလလောက်မှာ စိုက်ပျိုးကြတာပါ။ စိုက်ပျိုးချိန် နောက်ကျသွားရင်တော့ မြေကြီးအတွင်းမှာရှိတဲ့ အစိုဓာတ်တွေ စုပ်သွားတဲ့အတွက်ကြောင့် အပင်ဖြစ်ထွန်းမှု နည်းသွားတတ်ပါတယ်။

 ပဲတီစိမ်း စိုက်ခင်းမှာ အပင်ရောဂါအနေနဲ့ကတော့ အဝါရောင် မှိုစေ့ရောဂါများ ကျရောက်တတ်ပါတယ်။ အဲဒီ ပိုးမွှားရောဂါတွေကို ကာကွယ်ရန်အတွက်ဆိုရင် မိုးကြိုရာသီ ပဲတီစိမ်း စိုက်ပျိုးမယ်ဆိုရင်တော့ ရေဆင်း ၁၁ မျိုးနဲ့ ရေဆင်း ၁၄ မျိုးကို ရွေးချယ် စိုက်ပျိုးသင့်ပါတယ်။ အထူးသဖြင့် ရေဆင်း ၉ မျိုးတို့ကို စိုက်ပျိုးတော့မယ်ဆိုရင်တော့ မိုးနှောင်းကာလ ရာသီတွေမှာ စိုက်ပျိုးသင့်ပါတယ်။ တောင်သူတွေ ကြိုက်တတ်တဲ့ ရေဆင်း ၁ မျိုးကတော့ မိုးကြိုစိုက်ရင် ရောဂါ ကျရောက်တတ်တဲ့အတွက် မိုးနှောင်းကာလတွေမှာ စိုက်ပျိုးသင့်ပါတယ်။

ပဲတီစိမ်းက စိုက်ပျိုးပြီး သုံးလနဲ့ လေးလကြားမှာ ခူးဆွတ်ရပါတယ်။ ခူးဆွတ်တဲ့အခါမှာလည်း အပင်ကို မနှုတ်ရပဲနဲ့ အသီးကိုသာ ရွေးချယ် ခူးဆွတ်ရတာဖြစ်ပါတယ်။ ပဲတီစိမ်းရဲ့ ပန်းပွင့်မူကတော့ အဆုံးမရှိ ပန်းခိုင်ဖြစ်တဲ့အတွက်ကြောင့် တစ်ကြိမ်တည်းနဲ့ ခူးဆွတ်လို့ မပြီးဘဲ နှစ်ကြိမ်မှ သုံးကြိမ်အထိ ခူးဆွတ်ရပါတယ်။ ပဲစိုက်ပျိုးမှုနဲ့ ဂျက်ဆင်မြေ အသုံးပြုမှု ယူးရီးယား လက်ချားမှုန့် ရေနှင့်ရောပြီးတော့ ပန်းပွင့် ပွင့်ချိန်မှာ ပက်ဖျန်းပေးမှုတို့ကြောင့် ပဲထွက်နှုန်းက ကောင်းလာပါတယ်။ တစ်ဧကမှာ ရှိရမယ့်အရေအတွက် ရရှိအောင် စိုက်ပျိုးခြင်းကလည်း ပဲထွက်နှုန်း ကောင်းစေရန်အတွက် အဓိက အချက်ပဲဖြစ်ပါတယ်။

 ပဲတီစိမ်းကို မိုးနှောင်းမှာ စိုက်မယ်ဆိုရင်တော့ အပင်ဦးရေဟာ တစ်ဧကမှာ တစ်သိန်းသုံးသောင်းခန့် ရှိရမှာပါ။ တစ်ပင်နဲ့တစ်ပင်ကိုတော့ လေးလက်မခန့် ခွာပြီးတော့ စိုက်ပေးရမှာပါ။ မိုးစိုက်ကာလမှာတော့ တစ်ဧက ရှိရမယ့်အပင်ကတော့ ၈၇၀၀၀ ရှိရမှာဖြစ်ပြီးတော့ မျိုးစေ့နှုန်းကတော့ တစ်ဧကကို လေးပြည်ကနေ ခြောက်ပြည်အထိ သုံးသင့်ပါတယ်။

ပဲတီစိမ်းစိုက်ပျိုးရန်အတွက် မြေပြင်ချိန်မှာတော့ နွားချေးမြေသြဇာကို တစ်ဧကကို တင်း ၁၅၀၊ ဓာတ်မြေသြဇာအနေနဲ့ကတော့ ယူးရီးယား တစ်ပြည်၊ တီစူပါ ၂၄ ပြည်၊ ပိုတက် ၁၂ ပြည်နှုန်း ထည့်ရပါတယ်။ ကန့်ဓါတ်အနည်းဆုံး ၅ ရာခိုင်နှုန်းပါတဲ့ ဂျပ်ဆင်ကျောက်မြေမှုန့်ကိုတော့ တစ်ဧကမှာ ပြည် ၂၀ နှုန်း ထည့်ပေးရမှာပါ။ ပေါင်းမြက်များကိုတော့ စိုက်ပြီး ၂ ပတ်အကြာမှာ ပန်းပွင့်တဲ့အထိ ဂရုပြုပေးရန် လိုအပ်ပါတယ်။ ပန်းပြချိန်နဲ့ သီးပွင့် ကိန်းဝပ်ချိန်တွေမှာတော့ ရေတစ်ဂါလံကို ယူးရီးယားမြေသြဇာ ထမင်းစားဇွန်း လေးဇွန်းခွဲ၊ လက်ချားမှုန့် ထမင်းစားဇွန်း တစ်ဇွန်း ဖျော်ပြီးတော့ နံနက်ပိုင်းမှာ အရွက်အောက်ပိုင်းတွေကို ဖျန်းပေးရမှာပါ။

ပဲတီစိမ်း စိုက်ပျိုးရေးမှာ ဂရုပြု ဆောင်ရွက်ပေးရမယ့် အချက်တွေအနေနဲ့က မျိုးကောင်း၊ မျိုးသန့်တွေကို ရွေးချယ် စိုက်ပျိုးရမယ့်အပြင် စိုက်ချိန် မှန်ဖို့လည်း လိုအပ်ပါတယ်။ တစ်ဧကမှာ ရှိရမယ့် အပင်အရေအတွက်နဲ့ တစ်ပင်နဲ့တစ်ပင် အကွာအဝေးကြားတွေကိုလည်း ဂရုပြု စိုက်ပျိုးပေးရမှာပါ။ စိုက်ပျိုးပြီး ပန်းပွင့်ချိန်ကာလကိုလည်း ဂရုပြု ဆောင်ရွက်ပေးရပါတယ်။

ပဲတီစိမ်းကို ပန်းပွင့်ချိန်ကနေ ပဲတောင့်များ ရင့်တဲ့အထိကို တစ်လခန့် ကြာမြင့်ပါတယ်။ ပန်းပွင့်များ ကြွေကျမှုမရှိပဲ အသီးတင်မှုဖြစ်လာမယ့် အစေ့များ အောင်မြင် ဖြစ်ထွန်းရန်အတွက်ကတော့ ပရိုးတိန်းဓာတ်နဲ့ နိုက်ထရိုဂျင်ဓာတ်တို့ လိုအပ်ပါတယ်။ ရေကိုလည်း လိုအပ်ပါတယ်။ နိုက်ထရိုဂျင်ဓာတ် ရရှိမှု နည်းလာတဲ့အခါမှာ ပန်းပွင့်ချိန်နဲ့ ပဲတောင့် ရင့်ချိန်ကာလဟာ တိုလာတတ်ပါတယ်။ ပဲတောင့်ရင့်ရန် ကာလတိုလာရင် ပဲအထွက်နှုန်းကလည်း နည်းလာတတ်ပါတယ်။ ပဲပင်များ ပန်းပွင့်ပြီး နောက်ပိုင်းကာလတွေမှာ အသီးများ သီးချိန်နဲ့ အစေ့အဆံ ပြည့်ဖြိုးစေရန်အတွက်ကတော့ ရွက်ဖျန်းမြေသြဇာ လိုအပ်ပါတယ်။ ပဲစိုက် တောင်သူများအနေနဲ့ကလည်း ရွက်ဖျန်းမြေသြဇာကို သင့်တင့်သောအချိန်မှာ ဖျန်းပေးရမှာပဲ ဖြစ်ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required