မာလကာသီး စိုက်ပျိုးထုတ်လုပ်ခြင်း လေ့လာကြရအောင်

16 September 2016
မာလကာသီး စိုက်ပျိုးထုတ်လုပ်ခြင်း လေ့လာကြရအောင်

မာလကာပင်ရဲ့ မူရင်းဒေသကတော့ ပီရူးနဲ့ မက္ကဆီကို နိုင်ငံတွေကပဲ ဖြစ်ပါတယ်။ မာလကာသီးကို လူတန်းစားမရွေး နှစ်သက်စွာ စားသုံးလေ့ရှိပါတယ်။ မာလကာသီးမှာ အူနီမျိုးနဲ့ အူဖြူမျိုးဆိုပြီးတော့ နှစ်မျိုး ရှိပါတယ်။ မိုးရေချိန် လက်မ ၄၀ မှ မိုးရေချိန် လက်မ ၆၀ အတွင်း ရရှိတဲ့ အရပ်ဒေသတွေမှာဆိုရင်တော့ မာလကာပင် ကောင်းစွာ စိုက်ပျိုးဖြစ်ထွန်းပါတယ်။ စိုက်ပျိုးတဲ့နေရာမှာလည်း အစေ့ ဒါမှမဟုတ်ရင် ကိုင်းကူးပြီးတော့ စိုက်ပျိုးနိုင်ပါတယ်။

မာလကာပင် စိုက်ပျိုးနည်း နှစ်မျိုး ရှိပါတယ်။ အစေ့ကိုစိုက်တာနဲ့ အပင်ကို ကိုင်းကူးပြီးစိုက်တာဆိုပြီးတော့ စိုက်ပျိုးနည်းနှစ်မျိုးရှိပါတယ်။ အစေ့ကိုစိုက်တာကတော့ အနည်းဆုံး သုံးနှစ်လောက်နေမှ ဒီလိုအသီးမျိုးသီးတာပါ။ ကိုင်းကူးပြီးစိုက်မယ်ဆိုရင်တော့ တစ်နှစ်ခွဲ နှစ်နှစ်အတွင်းမှာ အသီးသီးနိုင်ပါတယ်။ ဒါကြောင့် ဒီ မာလကာနဲ့ပတ်သက်ပြီးတော့ စီးပွားဖြစ် စိုက်ပျိုးတဲ့သူတွေကတော့ ကိုင်းကူးပြီး စိုက်ပျိုးတာများပါတယ်။

အစေ့ကိုစိုက်မယ်ဆိုရင်တော့ အပင်ကို တစ်နှစ်သားရမှ ရွေ့ပြောင်းပြီး စိုက်ပျိုးရမှာဖြစ်ပါတယ်။ မာလကာပင်ကို စိုက်ပျိုးတဲ့အခါမှာ တစ်ပင်နဲ့တစ်ပင်ကို ၁၂ ပေခန့် ခွာပြီးတော့ စိုက်ပျိုးပေးရမှာပါ။ စိုက်ပျိုးရမယ့်ကျင်းကိုတော့ အကျယ်နှစ်ပေ အနက်နှစ်ပေ တူးပြီးတော့ မြေဆွေးနဲ့ အပေါ်ယံမြေကို ရောပြီး ပျိုးပင်ကို အလယ်တည့်တည့်မှာထားပြီးတော့ စိုက်ပျိုးသင့်ပါတယ်။ အခုစိုက်တဲ့ စိုက်ပျိုးနည်းကတော့ အစေ့ကို စိုက်ပျိုးတာထက် ကိုင်းကူးပြီးတော့ စိုက်ပျိုးတာက ပိုကောင်းပါတယ်။ စိုက်ခင်းများကိုလည်း တြိဂံပုစံစနစ်နဲ့ တစ်တွင်းနဲ့တစ်တွင်းကို ကိုးပေနဲ့ ဆယ်ပေအကွာ တူးထားပေးရမှာပါ။ တူးထားတဲ့ကျင်းထဲကိုတော့ မြေဆွေး သစ်ရွက်ဆွေး မီးဖိုပြာ ဖွဲကြမ်း မြက်ခြောက် စတာတွေကိုထည့်ပြီးတော့ မိုးရှို့ပြီး ထားပေးရမှာပါ။ ရေဝပ်တဲ့   နေရာဒေသတွေမှာဆိုရင်   ရေလွှတ်မြောင်းတွေ တူးပြီးတော့မှ စိုက်ပျိုးသင့်ပါတယ်။

အခုဆိုရင်တော့ ကျွန်တော် မာလကာခြံထဲမှာပါ။ ခြံထဲမှာ ကြည့်လိုက်တဲ့အခါကျတော့ အသီးတွေအကုန်လုံးကို ပလက်စတစ်အိပ်တွေ စွတ်ထားတာ  တွေ့ရပါတယ်။ နောက်ပြီးတော့ အိတ်တွေမှာ သတင်းစာတွေ ကပ်ထားတာ တွေ့ရပါတယ်။ အဲဒါကတော့ အသီးတွေကို အရောင်လှလှလေးဖြစ်အောင် စွပ်ထားတာပဲ ဖြစ်ပါတယ်တဲ့။

မာလကာပင်တွေကိုတော့ တစ်နှစ်မှာ နှစ်ကြိမ်ခန့် အစာကျွေးပေးရမှာပါ။ အပင်တစ်ပင်ကို နွားချေး တစ်တင်းခန့် အပင်ပတ်လည်ကို မြေဆွပြီး ကျွေးပေးရမှာလည်း ဖြစ်ပါတယ်။ ဒါအပြင် ပေါင်းသင်ခြင်း မလိုအပ်တဲ့ ကိုင်းများကိုလည်း ရှင်းလင်းပေးရမှာဖြစ်ပါတယ်။ မာလကာပင် စိုက်ပျိုးတဲ့သူတွေကတော့ ကိုင်းကူးခြင်းနဲ့ ပျိုးထုတ်တွေကို ထုတ်လုပ် ရောင်းချကြတဲ့အတွက် ကိုင်းကူးခြင်းဖြင့် ကိုင်းရှင်းတဲ့လုပ်ငန်းတွေကိုပါ ပြုလုပ်စေချင်ပါတယ်။

မာလကာပင်တစ်ပင် သီးဖို့ဆိုတာက ကိုင်းရှင်းပေဖို့ကလည်း အဓိကကျပါတယ်။ အဲတော့ ကျွန်တော်တို့ ကိုင်းရှင်းတဲ့အခါမှာ မလိုအပ်တဲ့ကိုင်းတွေ ရောဂါဖြစ်နေတဲ့ကိုင်းတွေကို ကျွန်တော်တို့ မဖြစ်မနေ ရှင်းပေးရမှာပါ။ မာလကာပင်တွေကတော့ ကိုင်းဆက် ကိုင်းကူးခြင်းနဲ့ စိုက်ပျိုးထားတဲ့အတွက် တစ်နှစ်သားကနေစပြီးတော့ အသီးသီးပါတယ်။ အစေ့နဲ့ စိုက်ပျိုးတဲ့အပင်တွေကတော့ အနည်းဆုံး လေးနှစ်လောက်မှ စပြီးတော့ သီးပါတယ်။ မာလကာသီးကို အစေ့နည်းအောင် စိုက်ပျိုးမယ်ဆိုရင်တော့ မျိုးစေ့ကို ပျိုးထောင်ခြင်းမပြုပဲ ကိုင်းကူးတဲ့နည်းဖြင့် စိုက်ပျိုးပါက မူလအပင်ထက် အစေ့များ လျော့နည်းသွားမှာလည်း ဖြစ်ပါတယ်။

မာလကာသီး ပွလာတဲ့အချိန်မှာ ကွဲအက်ခြင်း တစ်ပိုင်းစို တစ်ပိုင်းခြောက်ခြင်းတွေ ဖြစ်ခြင်းကတော့ရေဝပ်ခြင်းနဲ့ လောင်းရိပ်ကျခြင်းတွေကြောင့်ပဲ ဖြစ်ပါတယ်။ အဲလိုဖြစ်လာပြီဆိုရင်တော့ နွားချေး မီးဖိုပြာတွေကို အပင်ခြေရင်းကို ထည့်ပေးရမှာဖြစ်ပါတယ်။ လောင်းရိပ်ကျရောက်ခြင်းတို့ကလည်း အပင်ကိုင်းဖျားတွေ ခြောက်လာပြီး အပင်ကို သေစေနိုင်ပါတယ်။ ဒါအပြင် ပိုးကောင်ကျရောက်ခြင်းနဲ့ ပင်စီပေါက် ကျရောက်ခြင်း အမြစ်ကို ခြကိုက်ခြင်းတို့လည်း ဖြစ်တတ်ပါတယ်။ အဲဒီၤလိုဖြစ်လာမယ်ဆိုရင်တော့ ကိုင်းတွေကို ခပ်စောင်းစောင်းလေး ဖြတ်ပေးရမှာပါ။ ဖြတ်ထားတဲ့နေရာကို ကတ္တရာစေး သုတ်လိမ်းပေးရမှာပါ။ ရေဝပ်နေရင်တော့ ရေတွေကို ဖောက်ပေးရပါမယ်။ မာလကာသီးကို နှစ်ခြိုက်စွာ စားသုံးကြသလို မာလကာရွက်ကိုလည်း ဆေးဖက်ဝင်အပင်အဖြစ် အသုံးပြုနိုင်ကြပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required