တရုတ်တွင် ကာကွယ်ဆေးများ တရားမဝင် ရောင်းချမှုသတင်း ထွက်လာပြီးနောက် အာဏာပိုင်များ တစ်နိုင်ငံလုံးအတိုင်းအတာဖြင့် စစ်ဆေး

တရုတ်တွင် ကာကွယ်ဆေးများ တရားမဝင် ရောင်းချမှုသတင်း ထွက်လာပြီးနောက် အာဏာပိုင်များ တစ်နိုင်ငံလုံးအတိုင်းအတာဖြင့် စစ်ဆေး

ဇူလိုင် ၂၃ ။          ။ တရုတ်နိုင်ငံမှ ကျန်းမာရေးအာဏာပိုင်များသည် ယခုအခါ နိုင်ငံတစ်ဝန်း ကာကွယ်ဆေးထိုးခြင်း လုပ်ငန်းစဉ်များကို စတင်စစ်ဆေးနေပြီဖြစ်ကြောင်း သတင်းတစ်ရပ်တွင် ဖော်ပြသည်။

ကန်ဒေါ်လာ သန်း ၉၀ နီးပါး တရားမဝင် ရောဂါကာကွယ်ဆေးများကို ဒေသအများအပြားတွင် ရောင်းချနေခဲ့သည်ဆိုသော သတင်းများထွက်ပေါ်လာခဲ့ပြီးနောက် ယခုကဲ့သို့ တာဝန်ရှိသူများက စုံစမ်းစစ်ဆေးမှုများကို လုပ်ဆောင်လာခြင်းဖြစ်သည်။

ကာကွယ်ဆေးများ ဖြန့်ဖြူးရောင်းချခြင်းနှင့် ဆေးထိုးနှံခြင်း မှတ်တမ်းများအပါအဝင် လုပ်ငန်းစဉ်များအားလုံးကို တာဝန်ရှိသူများက လိုက်လံစစ်ဆေးသွားမည်ဖြစ်သည်။ တစ်နိုင်ငံလုံးအတိုင်းအတာအားဖြင့် တရားမဝင် ဆေးရောင်းချထားခြင်းရှိမရှိ နှင့် ယင်းဆေးများ အသုံးပြုထိုးနှံထားခြင်း ရှိမရှိတို့ကို စစ်ဆေးသွားမည်ဖြစ်ကြောင်း အမျိုးသားကျန်းမာရေး နှင့် မိသားစုစီမံကိန်းကော်မရှင်က ထုတ်ပြန်သည်။

အလားတူ နိုင်ငံတွင် ကာကွယ်ဆေး ထိုးနှံပေးမှုများ လုပ်ဆောင်နေသော ဆေးရုံ၊ဆေးပေးခန်းများကိုလည်း စစ်ဆေးမှုများလုပ်ဆောင်သွားမည်ဖြစ်သကဲ့သို့ တစ်နိုင်ငံလုံးရှိ ရောဂါထိန်းချုပ် ကာကွယ်ရေးအေဂျင်စီများအားလုံးကိုလည်း ဝင်ရောက်စစ်ဆေးမည်ဖြစ်သည်။

မကြာသေးသော ကာလတစ်ခုက ရှန်တုန် ဒေသမှ သားအမိနှစ်ဦး ကုန်သည်များထံမှ တရားမဝင်ကာကွယ်ဆေးများ ဝယ်ယူကာ နိုင်ငံတစ်ဝန်းရှိ ဆေးဝါးပြန်လည်ရောင်းချဖြန့်ဖြူးသူများဆီသို့ ရောင်းချနေသည်ကို စစ်ဆေးတွေ့ရှိထားခဲ့သည်။

ယင်းဖြစ်စဉ်နောက်ပိုင်း အာဏာပိုင်များက နိုင်ငံတစ်ဝန်း မှောင်ခိုဈေးကွက်မှ ကာကွယ်ရေး ဖြန့်ဖြူးရောင်းချနေမှုများကို တိုက်ဖျက်သွားမည်ဟု မတ်လအတွင်းက ကတိပြုပြောကြားခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required