နေပြည်တော်၊ မေ ၂၅ ။ ။ စစ်ဘေးသင့်ကလေးသူငယ်များ ကျောင်းဖွင့်ချိန်တွင် စာသင်ကြားနိုင်ရန်အတွက် အစိုးရအနေဖြင့် စီစဉ်ဆောင်ရွက်ပေးရန် အရေးကြီးအဆိုတစ်ရပ် လွှတ်တော်ရုံးသို့တင်ပြခဲ့သော်လည်း မေးခွန်းအဖြစ်သာမေးမြန်းရန် ခွင့်ပြုခဲ့သည်။
“စစ်ဘေးရှောင်ကလေးသူငယ်တွေ ၂၀၁၆-၂၀၁၇ ပညာသင်နှစ်မှာ ကောင်းမွန်စွာပညာသင်ကြားနိုင်ဖို့ အစိုးရကစီစဉ်ပေးဖို့တိုက်တွန်းတဲ့အဆိုပေါ့။ အဲ့ဒီ့ဟာကို စီစဉ်တာ။ ဒါပေမယ့် မေးခွန်းအဖြစ်ပြောင်းပြီး မေးပေးပါလို့ပြောလို့မေးခွန်းအဖြစ်ပြောင်းလိုက်ရတယ်” ဟု မန်တုံမြို့နယ်ပြည်သူ့လွှတ်တော်အမတ် ဒေါ်နန်းမိုးကပြောသည်။
၎င်း၏ မေးခွန်းအပေါ် အစိုးရအနေဖြင့် အခုချက်ချင်းဆောင်ရွက်ရန် မဖြစ်နိုင်ကြောင်း နှင့် မေးခွန်းမေးမြန်းရန် ၁၅ ရက်ခန့်ထပ်မံစောင့်ဆိုင်းခိုင်းသည်ဟု ၎င်းက ပြောသည်။
“အခုသီပေါမှာ ဒုက္ခသည်စခန်းမှာ ကလေးသူငယ် အယောက်သုံးရာကျော်ရှိတယ်။ ဒါပေမယ့် သူတို့ပညာရေးကဘယ်လိုလဲဆိုတော့ အစိုးရအနေနဲ့စီစဉ်ဆောင်ရွက်ထားခြင်းရှိမရှိ ကျမအနေနဲ့ သက်ဆိုင်ရာကိုမေးမြန်းတဲ့အခါမှာ ဘာမှအစီအစဉ်မရှိဘူးတဲ့” ဟု ဒေါ်နန်းမိုးက ဆက်လက်ပြောကြားသည်။
မည်သည့်အတွက် အရေးကြီးအဆိုမှ မေးခွန်းအဖြစ်သို့ပြောင်းမေးရန် ဆိုသည်ကို လွှတ်တော်ရုံးမှ အကြောင်းပြချက် မပေးခဲ့ကြောင်းနှင့် အရေးကြီးအဆို တင်ခွင့်မရသည့် အကြောင်းအရာများရှိကြောင်း ၎င်းကဆိုသည်။
“မွေးလူနာကို မင်းမမွေးနဲ့အုံးလို့ပြောလိုက်တဲ့သဘောပဲ။ ကျမအရမ်းခံစားရပါတယ်” ဟု ဒေါ်နန်းမိုးကပြောသည်။
စစ်ဘေးရှာင်ကလေးသူငယ်များအတွက် လွှတ်တော်အမတ်တစ်ယောက်အနေဖြင့် အရမ်းစိတ်ပူရင်လေးမိကြောင်း နှင့် အစိုးရဌာနအနေဖြင့် စစ်ဘေးရှောင်ကလေးသူငယ်များ ပညာသင်ကြားရန်အတွက် မည်သို့ဆောင်ရွက်ထားသည် နှင့် ပက်သက်၍ မေးခွန်းကိုထိရောက်စွာမေးမြန်းသွားမည် ၎င်းကပြောသည်။
