ချင်းမိုင်၊ မေ ၂၃ ။ ။ ကချင်ပြည်နယ်၊ ဗန်းမော်ခရိုင်၊ မန်စီမြို့နယ်အတွင်း တပ်မတော် နှင့် ကေအိုင်အေတိုက်ပွဲအတွင်း ပိတ်မိခဲ့သည့် ရွာသား ၅၀ကျော်သည် မိုင်းခေါင်းဒုက္ခသည်စခန်းကို ပြန်လည်ရောက်ရှိလာပြီ ဖြစ်သည်။
ကေအိုင်အေ တပ်မဟာ ၃ လက်အောက်ခံ တပ်ရင်း ၂၇ နှင့် တပ်မတော်တို့ တိုက်ပွဲအတွင်း မေလ ၂၃ရက် နံနက်ပိုင်းက ပိတ်မိခဲ့ခြင်းဖြစ်သည်။ မိုင်းခေါင်းကျေးရွာ နှင့် လိုင်ကာဇွပ်ဂျာ ကျေးရွာကြား မေ ၂၃ရက် နံနက် ၆နာရီကျော်က တိုက်ပွဲ တစ်ကြိမ်ဖြစ်ပွားခဲ့ကြောင်း အရပ်သား ကာကွယ်စောင့်ရှောက်ရေးအဖွဲ့ အဖွဲ့ဝင် ဦးနော်မိုင်က ပြောသည်။
“ပိတ်မိနေတဲ့ ရွာသားတွေ မရှိတော့ဘူး။ အခုအကုန်လုံး ထွက်လာနိုင်ပြီ။ သူတို့ဖာသာ သူတို့ သိတဲ့လမ်းကနေ ထွက်လာ တာဖြစ်တယ်။ အားလုံး ၅၀ ကျော်ရှိတယ်။ ကုန်တလောက ဖြစ်ပွားပြီ။ သူတို့က ဒီမှာနေပြီး ရွာကို အလုပ်သွားလုပ်တဲ့လူတွေ ဖြစ်ပါတယ်”ဟု ၎င်းက မဇ္ဈိမကို ပြောသည်။
ပိတ်မိခဲ့သည့် ရွာသားများက လိုင်ဇာဇွပ်ဂျာ၊ ဖဂါယန်၊ ကောင်းခါးပါ၊ မုန်းလူ စသည့် ကျေးရွာများမှ အလုပ်သွားလုပ်နေသည့် ရွာသားများဖြစ်ပြီး လေးရက်ကြာ ပိတ်မိရာမှ မေ ၂၃ရက် မွန်းလွဲ ၂နာရီခန့်က ဒုက္ခသည်စခန်းကို ပြန်လည်ရောက်ရှိ လာခဲ့ခြင်းဖြစ်သည်။
ကေအိုင်အေ နှင့် တပ်မတော်တု့ိ တိုက်ပွဲများမှာ မေ ၁၅ရက်က စတင်ဖြစ်ပွားနေခြင်းဖြစ်သည်။
ရှမ်းပြည်နယ် မြောက်ပိုင်း မုံးကိုးမြို့နယ် ဖောင်းဆိုင်ဒေသတွင်လည်း တပ်မတော်၏ တပ်မ ၉၉ လက်အောက်ခံ တပ်ရင်း တပ်ဖွဲ့ နှင့် ကေအိုင်အေ တပ်မတော် ၆ လက်အောက်ခံ တပ်ရင်း ၃၈တို့ မေ ၂၂ရက်က တိုက်ပွဲဖြစ်ပွားခဲ့ပြီး မန်ပိန်းကျေးရွာမှ အိမ်ခြေ ၂၀ကျော် မီးရှို့ဖျက်ဆီးခံခဲ့ရသည်ဟု ကေအိုင်အေ တပ်မဟာ ၄မှ ဗိုလ်မှူးကြီး ဇော်ဂမ်က ပြောသည်။
"တပ်မတော်ဘက်က ၂ ယောက် ကျတယ်လို့ သိရတယ်။ ရွာသားတွေက ကြိုတင်ထွက်ပြေးသွားနိုင်တယ်” ဟု ၎င်းက ပြောသည်။
မန်ပိန်းကျေးရွာတွင် အိမ်ခြေ ၂၀ ကျော်ရှိပြီး ကျေးရွာသားများသည် တရုတ်နယ်စပ်သို့ ထွက်ပြေးတိမ်းရှောင်သွားပြီ ဖြစ်ကြောင်း ၎င်းက ဆက်ပြောသည်။
ရှမ်းပြည်နယ်မြောက်ပိုင်း KIA တပ်မဟာ ၄ နှင့် တပ်မဟာ ၆ ဒေသများတွင် နေ့စဉ် တိုက်ပွဲ ဖြစ်ပွားနေဆဲ ဖြစ်သလို၊ လက်ရှိ ကျောက်မဲမြိ့ုနယ်အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော်နှင့် တပ်မတော်(SSPP/SSA)တို့အကြား တိုက်ပွဲ ဖြစ်ပွားနေဆဲ ဖြစ်ကာ တအာင်းအမျိုးသားတပ်မတော်(TNLA)နှင့် တပ်မတော်တို့အကြားလည်း ကျောက်မဲမြို့နယ် ပန်စံကျေးရွာအနီးတွင် မေလ ၂၂ ရက်က တိုက်ပွဲ ဖြစ်ပွားနေဆဲ ဖြစ်သည်။
ရှမ်းပြည်မြောက်ပိုင်း သီပေါမြို့နယ်၊ ကျောက်မဲမြို့နယ်နှင့် လားရှိူးမြို့နယ်မြို့နယ်အတွင်း SSPP/SSA က သတ်မှတ်နယ်မြေ ကျော်လွန်လာသည့် အတွက် တပ်မတော်စစ်ကြောင်းနှင့် မေလ ၅ ရက်မှ ၂၀ ရက်အတွင်း ထိတွေ့ တိုက်ပွဲ ၁၃ ကြိမ် ဖြစ်ပွားခဲ့ကာ တပ်မတော်ဘက်မှ တပ်ရင်းမှူး တစ်ဦး အပါအဝင် အရာရှိစစ်သည်တစ်ချို့ အသက်စွန့်ခဲ့ရကာ ထိခိုက်ဒဏ်ရာများစွာ ရရှိခဲ့သည်ဟု မေလ ၂၁ ရက် တပ်မတော်က ထုတ်ပြန်ထားသည်။
