မေ ၁၉၊ ဘေဆယ် ။ ။ ယူရိုပါလိဂ်ဗိုလ်လုပွဲစဉ်တွင် ဆီဗီလာအသင်းကို ၃-၁ ဂိုးဖြင့် ရှုံးနိမ့်ခဲ့ပြီးနောက်တွင် လီဗာပူးလ်အသင်းနည်းပြ ဂျာဂင်ကလော့ပ်က ဒိုင်လူကြီးများ၏မှားယွင်းသော ဆုံးဖြတ်ချက်လေးခုကြောင့် ရှုံးနိမ့်ခဲ့ရခြင်း ဖြစ်ကြောင်း ပြောဆိုလိုက်သည်။
ထိုပွဲစဉ်တွင် လီဗာပူးလ်အသင်းသည် စတူးရစ်ချ်၏သွင်းဂိုးဖြင့် ပထမပိုင်းတွင် ၁-၀ ဖြင့် ဦးဆောင်နိုင်ခဲ့သော်လည်း ဒုတိယပိုင်းတွင် ဂိုးများပြန်ပေးခဲ့ရသည့်အတွက် ရှုံးနိမ့်ခဲ့ရသည်။ ပထမပိုင်းတွင် ပင်နယ်တီဧရိယာစည်းအတွင်း လက်သုံးကြိမ်ထိခဲ့ခြင်းကို ကွင်းလယ်ဒိုင်က ပြစ်ဒဏ်ဘောမပေးခဲ့သလို ဆီဗီလာမှ ကိုကီသွင်းယူခဲ့သည့် လူကျွံဘောဂိုးကိုလည်း ခွင့်ပြုပေးခဲ့သည်။
'ဒီနေ့ပွဲမှာ အရေးပါတဲ့ ဆုံးဖြတ်ချက် လေးခုကြောင့် ကျွန်တော်တို့ ရှုံးနိမ့်ခဲ့ရတာ ဖြစ်ပါတယ်။ ဗိုလ်လုပွဲ ကစားတဲ့နေရာမှာ ကံကောင်းမှုတော့ အနည်းငယ်လိုအပ်ပါတယ်။ ကျွန်တော်တို့ လုံးဝကံမကောင်းခဲ့ပါဘူး။ အစကတည်းက ၂-၀ နဲ့ ရှုံးနေခဲ့တယ်ဆိုရင်တော့ တစ်မျိုးပေါ့။ အခြေအနေက ကွဲပြားမှာပါ။
အခုတော့ ကျွန်တော်တို့ စိတ်ပျက်ရပါတယ်။ မနက်ဖြန်ပြီးတော့ တစ်ပတ်လောက်ကြာရင် အခြေအနေက ပိုပြီး ရှင်းလင်းသွားပါလိ့မ်မယ်။ နောက်ရာသီမှာ ကျွန်တော်တို့ ဥရောပပြိုင်ပွဲတွေ ဝင်ခွင့်မရတော့ပါဘူး။ ဗုဒ္ဓဟူးနဲ့ ကြာသပတေးလို ကြားရက်တွေမှာ ပွဲကစားစရာမရှိဘူးဆိုတော့ ပိုပြီးလေ့ကျင့်နိုင်မှာပါ။ ကျွန်တော်တို့ အကောင်းဆုံးပုံစံနဲ့ ပြန်လာခဲ့ပါ့မယ်' ဟု ဂျာဂင်ကလော့ပ်က ပြောဆိုခဲ့သည်။
ရည်ညွှန်း စကိုင်းစပို့
