စစ်ပွဲတစ်ခုရဲ့ သားကောင်များ၊ စစ်ပွဲတစ်ခုရဲ့ ဇာတ်ကောင်များ

စစ်ပွဲတစ်ခုရဲ့ သားကောင်များ၊ စစ်ပွဲတစ်ခုရဲ့ ဇာတ်ကောင်များ

အင်တာနက် လူမှုကွန်ရက်စာမျက်နှာတစ်ခုတွင် လမ်းဘေးဆိုင်းဘုတ်တစ်ခုကို ဓါတ်ပုံ ရိုက်ယူတင်ထားသည်ကို တွေ့ကြရပါသည်။ ယင်းဆိုင်းဘုတ်တွင် “စစ်ပွဲကို နိုင်အောင်တိုက်နိုင်သည့် စစ်ဗိုလ်ချုပ်များကို မလိုချင်ပါ၊ စစ်ပွဲများ ချုပ်ငြိမ်းသွားအောင်လုပ်နိုင်သည့်ဗိုလ်ချုပ်များကိုသာ လိုချင်ပါ သည်” ဟူသည့် စာတန်းရေးထားသည်ကို ဖတ်ခဲ့ကြရပါသည်။ တချိန်တည်းမှာပင် စစ်နှင့်ပတ်သက်ပြီး လူထုခေါင်းဆောင်ဒေါ်အောင်ဆန်းစုကြည်ပြောခဲ့ဖူးသည့်စကားတစ်ခွန်းလည်း ရှိပါသည်။ စစ်ရေးအ မြင်သစ်ဆိုသည်မှာ စစ်ပွဲများ ထာဝရချုပ်ငြိမ်းသွားအောင် လုပ်နိုင်သည့် စစ်ရေးအမြင်ကို စစ်ရေးအ မြင်သစ်ဟု ခေါ်ဆိုသည်ဟူသည့် စကားဖြစ်သည်။

လွန်ခဲ့သော နှစ်ငါးဆယ်ကျော်လောက်ကမူ စစ်စစ်ကို စစ်နဲ့ဆန့်ကျင်ချုပ်ငြိမ်းအောင် လုပ်ကြရ မည်ဟူ၍လည်းကောင်း၊ တရားသောစစ်နှင့် မတရားသောစစ် ဟူ၍လည်းကောင်း စစ်နှင့်ပတ်သက် သည့် စစ်ရေးအမြင်များ ခေတ်စားခဲ့ဖူးသည်။ သို့သော် ယင်းစစ်ရေးအမြင်များကို ရာစုနှစ်ဝက်ကျော် လက်တွေ့အသုံးချကြည့်ကြသည့်အခါ နောက်ထပ် စစ်ပွဲများကို လက်ယပ်ခေါ်သလိုသာဖြစ်သည့် စစ်ရေးအမြင်များသာဖြစ်သည်ဟူ၍ စစ်ကို စစ်နှင့်ဆန့်ကျင်သည့် စစ်ရေးအမြင်ကို မှားယွင်းပြီး ချို့ယွင်းသော စစ်ရေးအမြင်အဖြစ် ရှုမြင်သည်များလည်း နောက်ပိုင်းတွင် ပေါ်ပေါက်လာခဲ့ရပါသည်။

မည်သို့သော စစ်ရေးအမြင်များ ပေါ်ပေါက်လာခဲ့သည်ဖြစ်စေ စစ်ပွဲဟူသမျှကိုမူ လူအများက ဆန့်ကျင် လာခဲ့ကြပါသည်။ လက်တွေ့အားဖြင့်ပင်လျင် မိမိတို့နိုင်ငံအတွင်း စစ်ဆန့်ကျင်ရေး လူထုလှုပ်ရှားမှုများ လမ်းမပေါ်တက်လာသည်အထိ ဖြစ်လာနေသည်ကပင် လက်တွေ့ဖြစ်သည်။ လူထုသည် စစ်ကို မလို လားတော့သည်မှာလည်း ထင်ရှားလှသည်။

အမှန်တကယ်တော့ ကမ္ဘာ့သမိုင်းကိုပြန်ကြည့်လျင် ကောင်းသည့်စစ်ဟူ၍ မရှိဘဲ မကောင်း သည့့်ငြိမ်းချမ်းရေးသည်လည်း မရှိဟူသည့် အယူူအဆမှာ လက်တွေ့အားဖြင့် မှန်ကန်သည်ကို တွေ့လာကြရသည်။ မည်သို့ပင်ဖြစ်စေ စစ်ကြောင့် ခံစားကြရ ရင်ဆိုင်ဖြတ်သန်းကြရသည့် လူသား တို့၏ လက်တွေ့ဘဝအရမူ တစ်ခုမှ ကောင်းသည်ကို မတွေ့ခဲ့ကြရပါ။ ဥပမာအားဖြင့်ပြောရလျင် မိမိတို့နိုင်ငံ ပြည်တွင်းစစ်ဒဏ်ကြောင့် မြေမြှုပ်မိုင်းဒဏ်ခံကြရသူများ၏ဘဝမှာ ကြေကွဲဖို့ကောင်းလှပါ သည်။ မြေမြှုပ်မိုင်းများရဲ့ခြိမ်းခြောက်မှုကို ခံစားနေကြရသည့် မိမိတို့ပြည်သူများ၏ ဘဝသည် တုန်လှုပ် ခြောက်ခြားဖို့ ကောင်းလှသည်။

မြေမြှုပ်မိုင်း အများဆုံး ရှိနေသည့် ဒေသများမှာ ကရင်ပြည်နယ်၊ ကချင်ပြည်နယ်နှင့် ပဲခူးတိုင်း အနောက်ခြမ်းဒေသများ ဖြစ်ကြသည်။ ရင်ဆိုင်တိုက်ခိုက်နေသော လက်နက်ကိုင်တပ်များ မြှုပ်နှံထားရှိ သည့် မြေမြှုပ်မိုင်း အရေအတွက်မှာ မှန်းဆလို့မရနိုင်အောင် များပြားလှပြီး စနစ်တကျ မြေပုံမြေညွှန်း နှင့် မြှုပ်နှံခြင်း မရှိသည့်အတွက် မိုင်းများ မည်သည့်နေရာတွင် ရှိနေသေးသည်ဟူသည်ကိုလည်း မည်သူမျှ မသိနိုင်အောင် ဖြစ်ကြရတော့သည်။ ထို့ကြောင့်လည်း စစ်ပွဲများအတွင်းတွင်မက စစ်မက် ငြိမ်သက်သွားသည့် ဒေသများတွင်လည်း မြေမြှုပ်မိုင်း ထိခိုက်ခံရသည့် လူထုအရေအတွက်မှာ များသ ထက် များလာခဲ့ရသည်။ တနိုင်ငံလုံးရဲ့ မြို့နယ် ၄၅ မြို့နယ်အတွင်း မြေမြုပ်မိုင်းများ ရှိနေဆဲဖြစ်တယ် လို့လည်း ကြွမ်းကျင်သူတို့က ဆိုပါသည်။ မြေမြှုပ်မိုင်း ထိခိုက်ခံရသည့် လူအရေအတွက်သည်လည်း လက်ရှိမှာ ခြောက်သောင်းခန့်အထိ ရှိနိုင်သည်ဟူ၍လည်း ဆိုပါသည်။

ဝမ်းနည်းဖွယ်ကောင်းသည့်အချက်မှာ မြေမြှုပ်မိုင်းဒဏ်ကို စစ်ပွဲနှင့် တိုက်ရိုက်သက်ဆိုင်သည့် စစ်သားများထက် အရပ်သားများက ပိုပြီး ထိခိုက်ခံစားနေကြရသည်ဆိုသည့် အချက်ဖြစ်သည်။

စစ်ပွဲတွင် စစ်၏ ဇာတ်ကောင်များဟူ၍လည်းကောင်း၊ စစ်၏ သားကောင်များဟူ၍လည်း ကောင်း ရှိသည်။ စစ်ကိုဖန်တီးသူ စစ်ပွဲတွင် ပါဝင်တိုက်ခိုက်နေသူ စစ်ပွဲနှင့် တိုက်ရိုက်ပတ်သက်သူများ မှာ စစ်၏ ဇာတ်ကောင်များဖြစ်သည်။ စစ်ပွဲနှင့် တိုက်ရိုက်မပတ်သက်သော်ငြားလည်း စစ်ပွဲကြောင့် ထိခိုက်သေကြေကြရ၊ အိုးအိမ်စည်းစိမ်များ ဆုံးရှုံးကြရသည့် အရပ်သားများကိုမူ စစ်၏သားကောင်များ ဟူ၍ ခေါ်ဆိုနိုင်ပါသည်။

မိမိတို့နိုင်ငံ၏ စစ်၏သားကောင်များအဖြစ် ကျရောက်နေကြရသည့် အပြစ်မဲ့ အရပ်သား နိုင်ငံ သားများ၊ မြေမြှှုပ်မိုင်းအန္တရယ် ကျရောက်နေသည့် အရပ်သားများအတွက် လက်ရှိ တိုင်းပြည်တာဝန်ရှိ သူူများအနေဖြင့် အထူးအလေးအနက်ထား အရေးယူဆောင်ရွက် ဖြေရှင်းပေးနိုင်ဖို့နှင့် မိမိတို့ကိုယ်တိုင် ကလည်း စစ်၏ ဇာတ်ကောင်များ၊ စစ်၏ သားကောင်များ မဖြစ်ကြဖို့ကိုလည်း မဇ္ဈိမက လေးနက်စွာ တိုက်တွန်းလိုက်ပါသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required