ဘေရွတ်၊ ဧပြီ၊ ၂၉ ။ ။ ဆီးရီးယားနိုင်ငံမြောက်ပိုင်းရှိ အလက်ပိုမြို့တွင် တိုက်ပွဲများကြောင့် ပြီးခဲ့သော ၇ ရက်အတွင်း အရပ်သားစုစုပေါင်း ၂၀၂ ဦးအထိ သေဆုံးခဲ့ရကြောင်း ဆီးရီးယား လူ့အခွင့်အရေး လေ့လာစောင့်ကြည့်ရေးအဖွဲ့က ယနေ့ ထုတ်ပြန်ခဲ့သည်။
သူပုန်များကို လေကြောင်းမှထိုးစစ်ဆင်တိုက်ခိုက်မှုများကြောင့် အလက်ပိုမြို့တွင် ကလေး ၁၈ ဦးအပါအဝင် အရပ်သား ၁၂၃ ဦးခန့်သေဆုံးခဲ့ရသည်။
ထို့အတူ အလက်ပိုမြို့အတွင်းရှိ အစိုးရတပ်များတပ်စွဲထားရာနေရာသို့ သူပုန်များက လက်နက်ကြီးများဖြင့် ပစ်ခတ် တိုက်ခိုက်မှုကြောင့် ကလေးငယ် ၁၃ ဦးအပါအဝင် စုစုပေါင်း အရပ်သား ၇၁ ဦးသေဆုံးခဲ့ရကြောင်း အဆိုပါ ဗြိတိန်အခြေစိုက် လူ့အခွင့်အရေးစောင့်ကြည့်ရေးအဖွဲ့ကပြောကြားသည်။
ကျန်အရပ်သား ၈ ဦးမှာမူ အလက်ပိုမြို့၏ သူပုန်များသိမ်းပိုက်ထားရာနေရာများကို အစိုးရတပ်များက ပစ်ခတ်တိုက်ခိုက် စဉ်တွင် သေဆုံးခဲ့ရခြင်းဖြစ်ပြီး ယင်း ၈ ဦးထဲတွင်လည်း ကလေးငယ် ၃ ဦးပါဝင်ခဲ့သည်။
အလက်ပိုမြို့တွင် ဆီးရီးယားအစိုးရပ်တပ်များနှင့်လက်နက်ကိုင်သူပုန်များကြား တိုက်ပွဲများ ပြန်လည်ပြင်းထန်လာခြင်းက နောက်လထဲတွင် ငြိမ်းချမ်းရေးဆွေးနွေးပွဲ အသစ်များ ကျင်းပနိုင်ရန်မျှော်လင့်နေသော ကုလသမဂ္ဂသံတမန်များအတွက် စိတ်ပျက်ဖွယ်ရာအခြေအနေဖြစ်လျှက်ရှိသည်။
သူပုန်များသည် ကြာသာပတေးနေ့ကပင် အစိုးရတပ်များတပ်စွဲထားသည့် နေရာများကို ဒုံးကျည်များဖြင့် ပစ်ခတ်တိုက်ခိုက် ခဲ့သေးရာ ထိုတိုက်ခိုက်မှုကြောင့် ကလေး ၃ ဦးအပါအဝင် အရပ်သား ၃၁ ဦးသေဆုံးခဲ့ရသည်။
အလက်ပိုမြို့၏ အရှေ့ပိုင်းဒေသများကို သူပုန်များက ၂၀၁၂ ခုနှစ်ကတည်းက သိမ်းပိုက်ထားပြီး အနောက်ပိုင်းဒေသများ မှာမူ အစိုးရတပ်များ၏ ထိန်းချုပ်မှုအောက်တွင် ရှိနေသည်။
