မတ် ၁၄ ၊ ရန်ကုန်။            ။ မြန်မာနေရှင်နယ်လိဂ် ပွဲစဉ် ၁၀ တွင် အမှတ်ပေးဇယားထိပ်ဆုံးမှ ရတနာပုံအသင်းသည် ဒုတိယနေရာမှ ဟံသာဝတီအသင်းအား အနိုင်ယူကာ ငါးမှတ်ဖြတ်၍ အမှတ်ပေးဇယားထိပ်ဆုံးတွင် ဆက်လက်ဦးဆောင် နိုင်ခဲ့သည်။ အဆိုပါပွဲသည် အမှတ်ပေးဇယားထိပ်ဆုံးမှ အသင်းကြီးနှစ်သင်းဖြစ်သည်နှင့် အညီ ပြိုင်ဆိုင်မှုများပြင်းထန်ခဲ့ပြီး ရတနာပုံအသင်းမှ ကိသ်၊ အောင်သူတို့၏ သွင်းဂိုးများကြောင့် ၁-၃ ဖြင့် အနိုင်ရခဲ့သည်။

ယင်းပွဲတွင် ရတနာပုံနည်းပြရီနီသည် လက်ပစ်ဘောပြစ်မည့် ဘောလုံးအား ကန်ထုတ်ကာ ဟံသာဝတီအသင်းကစားသမားများနှင့် စကားများခဲ့သည့်အတွက် ကွင်းလယ်ဒိုင်က ကွင်းအတွင်းမှ ထုတ်ပယ်ခဲ့သည့်အတွက် ယခုနှစ် ဘောလုံးရာသီပထမဦးဆုံး ကွင်းအတွင်းမှ ထုတ်ပယ်ခံခဲ့ရသည့် နည်းပြအဖြစ် မှတ်တမ်းဝင်ခဲ့သည်။

အခြားပွဲစဉ်များဖြစ်သည့် ဆောက်သမ်းမြန်မာအသင်းနှင့် ချင်းယူနိုက်တက်အသင်းတို့ပွဲတွင် ချင်းအသင်းက ခြေစွမ်းပြကာ ၃-၀ ဖြင့် ဂိုးပြတ်အနိုင်ရခဲ့သလို ရခိုင်အသင်းကလည်း တန်းဆင်းဇုန်အတွင်းမှ ဟော်ရဇွန်အသင်းအား ၃-၀ ဖြင့် ဂိုးပြတ်အနိုင်ရအောင် စွမ်းဆောင်နိုင်ခဲ့သည်။

ဇေယျာရွှေမြေအသင်းမှာမူ အိမ်ကွင်း မုံရွာကွင်းတွင် ဧရာဝတီအသင်းအား လက်ခံကစားခဲ့ရသော်လည်း အမှတ်ယူနိုင်ခြင်းမရှိပဲ ဝ-၁ ဖြင့် ရှုံးနိမ့်ခဲ့သည်။ ကျန်ပွဲစဉ်ဖြစ်သည့် မကွေးအသင်းနှင့် ရှမ်းယူနိုက်တက်အသင်းပွဲတွင် တစ်ဖက်နှင့်တစ်ဖက် အကြိတ်အနယ်ယှဉ်ပြိုင်ကစားကာ တစ်ဂိုးစီသရေဖြင့် ပြီးဆုံးခဲ့သည်။

ယခုတစ်ပတ် လိဂ် ပွဲစဉ် ၁၀ တွင် ရန်ကုန်ယူနိုက်တက်အသင်းနှင့် ဇွဲကပင်အသင်းတို့ ပွဲစဉ်အား AFC Cup အုပ်စုပွဲယှဉ်ပြိုင်ကစားရမည် ဖြစ်သည့်အတွက် ဧပြီ ၇ ရက်သို့ ပြောင်းရွေ့ကစားစေခဲ့သည်။

၂၀၁၆ မြန်မာနေရှင်နယ်လိဂ် ပွဲစဉ် ၁၀ ပွဲများ ပြီးဆုံးချိန်တွင် ရတနာပုံအသင်းက ရမှတ် ၂၆ မှတ်ဖြင့် အမှတ်ပေးဇယားထိပ်ဆုံးတွင် ဆက်လက်ဦးဆောင်နိုင်ခဲ့ပြီး ဟံသာဝတီအသင်းက  ရမှတ် ၂၁ မှတ်ဖြင့် ဒုတိယ၊ ဧရာဝတီအသင်းက ရမှတ် ၁၇ မှတ်ဖြင့် တတိယနေရာတို့တွင် အသီးသီးရပ်တည်လျက်ရှိသည်။