(ပေကျင်း)။ ။ တရုတ်ဦးဆောင်သော အာရှအခြေခံ အဆောက်အအုံ ရင်းနှီးမြုပ်နှံမှုဘဏ် (AIIB) ၏ တည်ထောင်သူ အဖွဲ့ဝင်နိုင်ငံ ၅၇ နိုင်ငံမှ ကိုယ်စားလှယ်များသည် ဇွန် ၂၉တွင် အင်စတီကျူးရှင်းသစ် တည်ထောင်မှုအတွက် စာချုပ်ပါအချက်များ ကို သဘောတူလက်မှတ်စတင်ရေးထိုးခဲ့သည်။
ငွေထုတ်ချေးပေးရန် ဒေါ်လာ ဘီလျံပေါင်းများစွာ ရှိနေမည့် AIIB ဘဏ်သည် ယခုနှစ် နောက်ပိုင်းတွင် လုပ်ငန်းစတင်လည်ပတ်
နိုင်ဖွယ်ရှိသည်။ ယင်းဘဏ်သည် ကမ္ဘာ့ဘဏ်နှင့် အာရှဖွံ့ဖြိုးရေးဘဏ်တို့၏ ပြိုင်ဘက်ဖြစ်လာနိုင်ကြောင်း သုံးသပ်မှုအချို့ရှိနေသည်။ ကမ္ဘာ့ပေါ်တွင် ပထမနှင့် တတိယမြောက် စီးပွားရေး အင်အားကြီးနိုင်ငံများဖြစ်သော အမေရိကန်နှင့် ဂျပန်က ပါဝင်ရန်ငြင်းဆန်ထားသည်။
အမေရိကန်က ၎င်း၏ မဟာမိတ်များကို AIIB ဘဏ်ထဲသို့မဝင်ရန် စည်းရုံးခဲ့သေးသည်။ သို့သော်လည်း ဗြိတိန်၊ ပြင်သစ်နှင့် ဂျာမနီအပါအဝင် ဥရောပနိုင်ငံများသည် ကမ္ဘာ့ဒုတိယအကြီးဆုံး စီးပွားရေး အင်အားကြီးတရုတ်နှင့် ဆက်ဆံရေး တိုးမြင့်လိုသဖြင့် လက်မှတ်ရေးထိုးခဲ့ကြခြင်းဖြစ်သည်။ အာရှတွင် အခြေခံအဆောက်အအုံအတွက် ငွေထုတ်ချေးသူ AIIB ဘဏ်၏ ပွင့်လင်းမြင် သာမှုနှင့် ပတ်သက်၍ စိုးရိမ်မှုအချို့ ရှိနေသကဲ့သို့ တရုတ်သည် အင်အားကြီးနိုင်ငံတစ်ခုအနေဖြင့်၎င်း၏ ပထဝီနိုင်ငံရေးနှင့် စီးပွားရေးအကျိုးအမြတ်များအတွက် ဘဏ်ကို အသုံးချလိမ့်မည်ဆိုသည့် စိုးရိမ်များလည်းရှိနေသည်။
ယခုလတွင် သတင်းရင်းမြစ်များကို မဖော်ပြခဲ့သော ဝေါစထရိဂျာနယ်၏ သတင်းတစ်ခုအရ ဘဏ်၏မဲပေးစနစ်တွင် အကြီးမား ဆုံးရှယ်ယာထည့်ဝင်သူအဖြစ် တရုတ်ကိုအသာစီးပေးရမည်ဖြစ်ပြီး ထိရောက်သည့်ဗီတိုအာဏာလည်းရရှိမည်ဟု ဆိုသည်။
ဘဏ်၏ သင်းဖွဲ့စည်းမျဉ်းများအရ ဘဏ်၏ ဘီလျံ ၁၀၀ အခြေခံအရင်းအနှီးတွင် တရုတ်က ဘီလျံ ၃၀ နီးပါးထည့်ဝင်မည်ဖြစ် သကဲ့သို့ မဲအားလုံး၏ ၂၅ရာခိုင်နှုန်းမှ ၃၀ရာခိုင်နှုန်းအထိလည်းပိုင်ဆိုင်မည်ဟုဆိုသည်။
