ဖေဖော်ဝါရီ ၂၃ ၊ ရန်ကုန် ။ ။ AFC Cup အုပ်စုအဖွင့်ပွဲစဉ်အဖြစ် ဖေဖော်ဝါရီ ၂၄ ရက်တွင် တောင်တရုတ်နှင့် ယှဉ်ပြိုင်ကစားမည့် ရန်ကုန်ယူနိုက်တက်အသင်းအနေဖြင့် အဓိကကစားသမား သုံးဦး ဒဏ်ရာပြဿနာကြောင့် ပါဝင်ကစားနိုင်ခြင်းမရှိဘဲ လွဲချော်မည် ဟု ရန်ကုန်အသင်းမန်နေဂျာ ဦးမြင့်သိန်းက ပြောသည်။
အဆိုပါကစားသမားသုံးဦးမှာ ဂျပန်နောက်ခံလူယာမာရှီတာ (ပခုံးဒဏ်ရာ) ၊ ဇော်မင်းထွန်း (ခြေဖမိုးဒဏ်ရာ) ၊ ကျော်မင်းဦး (ခြေကျင်းဝတ်ဒဏ်ရာ) တို့ အသီးသီး ရရှိနေခြင်းဖြစ်ပြီး ရန်ကုန်အသင်း၏ လာမည့် ပွဲစဉ် နှစ်ပွဲအထိ ဆက်လက်လွဲချော်သွားမည် ဖြစ်သည်။
ရန်ကုန်အသင်း၏ ကစားသမားများ ဒဏ်ရာပြဿနာနှင့် ပတ်သက်၍ “ အသင်းက လောလောဆယ် အဓိကကစားသမား သုံးဦး ဒဏ်ရာပြဿနာရှိပါတယ်။ ဂျပန်နောက်ခံလူရယ် ကျော်မင်းဦးရယ် ဇော်မင်းထွန်းရယ်ပါ။ ယာမာရှီတာက နှစ်ပတ်လောက်နားရပါဦးမယ်။ ဇော်မင်းထွန်းလည်း အဲ့လောက်နားရမယ့် အခြေအနေဖြစ်နေပါတယ်။ ကျော်မင်းဦးကတော့ အပေါ့စားလေ့ကျင့်ခန်းလုပ်နိုင်နေပမယ့် ပွဲကစားနိုင်တဲ့ ကြံ့ခိုင်မှုတော့ ပြန်မရသေးပါဘူး။ လာမယ့် တောင်တရုတ်နဲ့ပွဲက အုပ်စုအဖွင့်ပွဲဖြစ်လို့ အသင်းကို နည်းပြရော ကစားသမားတွေရော အားလုံးကတော့ အကောင်းဆုံး ပြင်ဆင်နေကြပါတယ် ” ဟု ဦးမြင့်သိန်းက ပြောသည်။
ရန်ကုန်ယူနိုက်တက်အသင်းသည် ယခုနှစ် ၂၀၁၆ AFC Cup ပြိုင်ပွဲတွင် အုပ်စု (ဆ) ၌ အိန္ဒိယကလပ် မိုဟမ်ဘေဂန်အသင်း၊ တရုတ်ကလပ် တောင်တရုတ်အသင်း၊ မော်လဒိုက်ကလပ် မက်ဇီယာအသင်း တို့နှင့် တစ်အုပ်စုတည်း ကျရောက်လျက်ရှိသည်။ ရန်ကုန်အသင်းသည် အုပ်စုအဖွင့်ပွဲတွင် တောင်တရုတ်အသင်းနှင့် လာမည့် ဖေဖော်ဝါရီ ၂၄ ရက် ညနေ ၄း၀၀ နာရီ၌ ရန်ကုန်မြို့ သုဝဏ္ဏကွင်း၌ အိမ်ကွင်းပွဲစဉ်အဖြစ် စတင်ယှဉ်ပြိုင်ကစားရမည် ဖြစ်သည်။
