ဖေေဖော်ဝါရီ ၁၄၊ ရန်ကုန်။ ။ ကရင်ပြည်နယ်ကိုယ်စားပြု ဇွဲကပင်ယူနိုက်တက်အသင်းအနေဖြင့် ကရင်ပြည်နယ်တွင် အိမ်ကွင်းတည်ဆောက်ရန် အစိုးရအကူအညီလိုအပ်သည်ဟု အသင်းပိုင်ရှင် ဦးလှဋ္ဌေးကပြောသည်။
ဇွဲကပင်အသင်းမှာ ကရင်ပြည်နယ်၊ ဘားအံမြို့တွင် အိမ်ကွင်းတည်ဆောက်ရန်ရည်ရွယ်ထားပြီး အကြောင်း အမျိုးမျိုးကြောင့်ကြန့်ကြာနေကာ လာမည့်နှစ်ဘောလုံးရာသီတွင် ပြန်လည်စတင်ရန် စီစဉ်ထားသည်။ “အိမ်ကွင်းဆောက်ဖို့က လောလောဆယ်လျာထားပြီးသားရှိပါတယ်။ ဒါပေမယ့် ကျွန်တော်တို့ချည်းပဲအဆင်မပြေနိုင်ဘူး။ ပြည်နယ်အစိုးရကလည်း ကူညီဖို့လိုမယ်။ နောက်တက်လာမယ့် အစိုးရက အားကစားကိုဘယ်လောက်အထိအားပေးမလဲဆိုတာစောင့်ကြည့်ရမှာပါ။”ဟု ဦးလှဋ္ဌေးကပြောသည်။
ဇွဲကပင်အသင်းကို ၂၀၁၀ခုနှစ်တွင်စတင်ဖွဲ့စည်းခဲ့ပြီး လေ့ကျင့်ရေးကွင်းအဖြစ် ရန်ကုန်မြို့၊ မရမ်းကုန်းမြို့နယ် အတွင်းရှိ နဝဒေးကွင်းကို အသုံးပြုနေသည်။ ဇွဲကပင်အသင်းကို ကရင်ပြည်နယ်အတွင်း အခြေမစိုက်နိုင်သေးသော်လည်း ၂၀၁၆ခုနှစ်အတွင်း ဇွဲကပင်ဘောလုံးအကယ်ဒမီကို ဘားအံမြို့တွင်ဖွင့်လှစ်ရန်စီစဉ်ထားသည်။