တိုင်းရင်းသားဘာသာပြန် အသိပညာပေးစာအုပ်များကြောင့် မဲပေးမှုပိုများ

တိုင်းရင်းသားဘာသာပြန် အသိပညာပေးစာအုပ်များကြောင့် မဲပေးမှုပိုများ

ရန်ကုန်၊ ဇန်နဝါရီ ၂၇ ။            ။ မြန်မာနိုင်ငံရွေးကောက်ပွဲဆိုင်ရာ သတင်းအချက်အလက်ကွန်ယက် (MERIN) မှ တိုင်းရင်းသား ဘာသာပြန်ဖြန့်ဝေသည့် ရွေးကောက်ပွဲဆိုင်ရာ အသိပညာပေး စာအုပ်များကြောင့် ကျေးလက်နေ တိုင်းရင်းသားများ မဲပေးမှုပိုများလာခဲ့ကြောင်း Evalution Team ၏ Consultant ဒေါ်ဟီသာမော်ရစ်က ပြောသည်။

" ကျွန်မတို့ သိရတာတော့ မြို့ပေါ်ကပြည်သူတွေ ၃၀ ရာခိုင်နှုန်းလောက် မဲပေးပြီးတဲ့အချိန်မှာ ကျေးလက်ဒေသက ပြည်သူတွေက ၇၀ ရာခိုင်နှုန်းလောက် မဲပေးခဲ့ကြတယ်။ အဲ့ဒါကြောင့် ဒီလုပ်ဆောင်မှုကို  ကျေနပ်ပါတယ် " ဟု Evalution Team ၏ Consultant ဒေါ်ဟီသာမော်ရစ်က ပြောသည်။

အင်တာနက် ဝက်ဘ်ဆိုဒ်သည်လည်း အင်တာနက်ကော်နက်ရှင်ရှိသော နေရာတိုင်းသို့ သတင်း အချက်အလက်များ ချက်ခြင်းရောက်နိုင်ကြောင်း၊ ဘာသာပြန်စာအုပ်များ   ဖြန့်ဝေရာတွင်   ရွေးကောက်ပွဲရက်နှင့် နီးကပ်သွားသောကြောင့် နေရာအနှံ့သို့ မရောက်နိုင်သည့် အားနည်းချက်ရှိခဲ့ကြောင်း ၎င်းကပြောသည်။

" ကျွန်တော်တို့ အားနည်းသွားတာက နယ်တွေအထိ ပညာပေးရေးကို မလုပ်နိုင်ခဲ့ဘူး။ ဘာသာပြန်စာအုပ်တွေ ဖြန့်ဝေရာမှာလည်း ရွေးကောက်ပွဲရက်နဲ့ ကပ်သွားတော့ နယ်တွေကို အချိန်မီ စာအုပ်တွေ မပို့နိုင်ခဲ့ဘူး။ ၂၀၂၀ ရွေးကောက်ပွဲမှာတော့ အဆင့်သင့်ဖြစ်အောင် ကြိုးစားပြီး ပညာပေးလုပ်ငန်းတွေ လုပ်ဆောင်သွားပါမယ် " ဟု MERIN ၏ ဒါရိုက်တာ ဦးကပ်နိုးက ပြောသည်။

ရွေးကောက်ပွဲရလဒ်များ သိရချိန်တွင် ပယ်မဲမှာ ၅ ရာခိုင်နှုန်းသာရှိပြီး ၇၀ ရာခိုင်နှုန်းခန့် မဲပေးခဲ့ကြသောကြောင့် ရွေးကောက်ပွဲဆိုင်ရာ အသိပညာပေး လုပ်ငန်းများအတွက် အားရကျေနပ်မိကြောင်းလည်း ၎င်းက ပြောသည်။

မြန်မာနိုင်ငံ ရွေးကောက်ပွဲဆိုင်ရာ သတင်း အချက်အလက် ကွန်ယက် (MERIN – Myanmar Electoral Resource and Information Network) ကို အရပ်ဖက် လူမှုအဖွဲ့အစည်း တစ်ခုဖြစ်သည့် ငြိမ်းအေးရှေ့ဆောင် (TSI – The Serenity Initiative) မှ ရွေးကောက်ပွဲ ဖြစ်စဉ်ကြီးတွင် ပါဝင်မည့်သူများ အဆင်ပြေ လွယ်ကူချောမွေ့စွာ ပါဝင်နိုင်စေရေး၊ ၂၀၁၅ ရွေးကောက်ပွဲအမီ သတင်း အချက်အလက်များ၊ ရွေးကောက်ပွဲဆိုင်ရာ ဥပဒေ၊ နည်းဥပဒေများ၊ ရွေးကောက်ပွဲဆိုင်ရာ စာတမ်းများ၊ ရွေးကောက်ပွဲဆိုင်ရာ သတင်း အချက်အလက်နှင့် အရင်းအမြစ်များ ပံ့ပိုးပေးနိုင်စေရန် ရည်ရွယ်ချက်ဖြင့် ၂၀၁၅ ခုနှစ် ဇူလိုင်လ (၁၀) ရက်နေ့တွင် စတင်ဖွင့်လှစ်ခဲ့ခြင်း ဖြစ်သည်။